Projek nyendiaka ai Tanjung Manis dipenyadi Abang Johari
Meri jamin nyadi polisi perintah Sarawak nyendiaka infrastruktur asas, ai enggau elektrik di kandang menua pesisir
TANJUNG MANIS: Premier Sarawak Datuk Patinggi Tan Sri Abang Johari Tun Openg kemari bejadi Projek Nyendiaka Ai Tanjung Manis berega RM974.1 juta ti udah berengkah beoperasyen kenyau 2 Oktober 2023.
Iya muji peranak Tanjung Manis laban projek nyendiaka ai Tanjung Manis tembu ba bulan September taun nyin kemari, ti lalu meri jamin nyadi polisi perintah Sarawak nyendiaka infrastruktur asas, ai enggau elektrik di kandang menua pesisir.
“Tu begunaka ungkup belanja ti mayuh, enti sebedau tu kitai bepanggai ba Opis Menteri Pemansang Menua Pesisir enggau Wilayah, bisi maya nya bisi lalu bisi maya nadai, projek enda bejalai enggau lanchar.
“Kitai bisi chara baru, kitai bulih ungkup belanja ari duit Sarawak, nya alai projek ulih mujur dipejalaika,” ku iya maya bejaku ba pengawa bejadi projek nya.
Sama bisi datai Menteri Utiliti enggau Telekomunikasyen Datuk Julaihi Narawi,
Sapit Menteri Pemansang Mengeri enggau Pengeraja Asal Datuk Len Talif Salleh enggau pemesai bukai.
Abang Johari madahka, Sarawak ngerikutka asil sepenyampau RM13.3 bilion taun 2023, sereta nya asil pemadu tinggi kala dijapai nengeri sereta deka terus nambah taun tu enti GPS agi bekuasa.
Chairman GPS nya madahka, patut dikeingatka iya nya enti ngelanggur projek, ungkup belanja patut chukup, enti enda chukup projek nya betangguh.
Iya mega minta Opis Menteri Utiliti enggau Telekomuniasyen ngadu manah agi pengawa ngagihka ai projek nyendiaka ai Tanjung Manis awakka ai nya ulih disambung ngagai semua rumah panjai nyentuk ke Sibu.
Abang Johari madahka, nya deka begunaka kos belanja tinggi, tang enti iya agi ngiring perintah GPS, iya deka ngiga jalai ngempul belanja kena bekalaika nya.
Ke rikut, Loji Penapis Ai Tanjung Manis nya ulih ngasilka nyentuk 50 juta liter sehari (jlh) ai mata ari Sibu ke Tanjung Manis.
Loji nya ulih ngeluarka 30 mld ari ti ditapis lalu diagih ngagai peranak ngelinggi kandang menua nya, lalu 20 mld ulih disediaka ngagai industri di Tanjung Manis.
Abang Johari arap bendar diatu setipak bendar rayat ngena kereban nya kena ngangkatka ekonomi sida, ambika chunto, ngelakuka Belawai nyadi palan dagang temuai nengah pengawa numbuhka palan dagang
temuai enggau homestay.
Iya mega ngenang mayuh prospek ekonomi ti ulih diserungkai ba kandang menua nya baka Sustainable Aviation Fuel (SAF) di Rajang, dagang karbon di kandang paya,
ladang padi enggau industri pengilang, betanam betupi enggau servis bukai.
Abang Johari komited Sarawak nyadi nengeri maju di Malaysia lebuh manggai 2030, sereta dalam timpuh ti
sama, iya deka nentuka semua inisiatif enggau projek ti dipejalaika ngayaka rayat.
Kelimpah ari nya, maya pengawa meri penerang projek nya, Abang Johari minta Opis Menteri utiliti enggau
Telekomunikasyen masang arus paip ai ba tujuh alai di semua jematan ti nyambungka Tanjung Manis enggau kandang menua ngelinggi.
Nitihka iya, iya nemu bisi tujuh arus paip benung digaga baruh sungai lalu nyema dalam tanah bisi berenyang, laban ia ba atas tanah kerapa, arus paip nya deka tekeruga lalu ngujungka penanggul ai nyadi.
“Enti bisi jematan, kitai ngenegapka jematan, arus paip nya engkah atas jematan, nyema pantis kitai nemu, enti enda orang deka betanyaka pasal projek nya.
“Kitai ngena akal, enti enda chukup duit, GPS meri duit, terus ngaga tabung nya tanggungpengawa aku, seagi rayat bulih penguntung, aram kitai sama besampi ngambika asil Sarawak nambah,” ku iya.
Kelimpah ari nya Abang Johari madah opis menteri deka ngena aplikasyen digital kena ngurus tauka ngatur grid nyendiaka ai Sarawak nengah chara ngerikutka semua arus paip baru dalam sistem nya, ti deka ngemudahka pengawa ngadu sistem nyema bisi pantis.
Kitai bisi chara baru, kitai bulih ungkup belanja ari duit Sarawak, nya alai projek ulih mujur dipejalaika.
Datuk Patinggi Tan Sri Abang Johari Tun Openg