Pelin betul Sibu ulih nyadi mengeri besai tikas dunya
Ngena pelin ti betul, Sibu ulih sebuah mengeri besai betikas dunya, ku Sapit Premier Sarawak Datuk Amar Dr. Sim Kui Hian.
Iya madahka, Langgur Ngemaru Mengeri Sibu iya nya dikena ngaga sebuah mengeri besai baru.
“Mayuh orang enda mereti ke pasal langgur tu. Ia ukai baka ngaga taman, kandang genturung pendiau tang projek ti 500 ekar tanah.
“Nya alai, begunaka timpuh sereta bisi mayuh pelin enggau langgur nyengkaum belanja ti diungkupka perintah,” ku iya.
Iya madahka pekara nya maya pengerami Taun Baru China Majlis Perbandaran Sibu(MPS)diDewanCanselor Tun Abdul Taib Mahmud Universiti Teknologi Sarawak (UTS) ditu, kemari.
Sama bisi datai bini iya Datin Amar Enn Ong Siok Ean; Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang; Kaban
Kunsil Nengeri (ADUN) Bukit Assek, Joseph Chieng; Chairman MPS Clarence Ting; Sapit Chairman MPS Mohammad Abdullah Izkandar Roseley; Pemangku Sekretari MPS Tony Wong enggau chairman pengatur Kaunselor Kiing Teck Ho.
Dr. Sim madahka, langgur ngemaruka mengeri Sibu digaga ba endur asal sereta ukai ba taba baru.
“Mayuh rumah, begunan komersial enggau ti bukai diambi kena ngamatka tuju tu. Langgur tu pekara besai ti begunaka timpuh. Enti orang madah projek tu ulih digaga dalam timpuh tiga bulan, iya bula.
“Laban kitai ngaga sebuah mengeri besai, ngemansangka baru mengeri Sibu nyadi sebuah mengeri besai udah tentu enda ulih digaga dalam timpuh pandak,” ku iya.
Dr. Sim ti mega Menteri Pengerai Mensia Mayuh, Pengawa Berumah enggau Perintah Lokal meragam Sibu deka bisi rumah, pangsapuri enggau mengeri besai dikelingi terusan.
“Aku ti asal ari Kuching ninding Sibu. Tu mih ti dikumbai kitai ngaga menua bansa ungkup bala anak, uchu ichit jemah ila. Laban asil ia ukai ungkup sehari tu, tang ke rebak dudi ila,” ku iya.
Enggau penyampat langgur projek nya, iya ngarapka penyanding penemu lokal ulih ngambi awak sama bejalaika tanggungpengawa.
Taja langgur projek nya ngena penyanding penemu antarabansa, ku iya, penyanding penemu lokal sama tau enggau ngerebut awak nya kena belajar.
“Kitai ulih belajar ari orang luar, enti kitai udah pandai kitai mega ulih ngajar orang luar enti undah bisi peneleba ngemaruka Sibu.
“Nya alai, aku meransang sida ti bekaul ngambika beranakka puku ba projek tu, anang meda aja, orang Sibu mesti ngambi awak tu sama enggau besaup nempa menua bansa,” ku iya.