Semua kontraktor diperati, dilawa kena nentuka projek tembu nitih timpuh
Sapit Premier Sarawak Datuk Amar Douglas Uggah Embas sekali agi ngingatka semua kontraktor deka tetap chakah diperati sereta suah dilawa dikena nentuka projek ulih tembu baka ti udah ditetapka.
Uggah ti mega Menteri Infratsruktur enggau Pemansang Penyangkai Kapal ngingatka pekara nya lebuh ti ngabas projek ngemanahka agi Jalai Baru Matang Fasa 2 ti benung digaga.
Ku iya pengawa merati tauka matau enggau ngabas deka chakah dipejalaika kelebih agi projek ti sebedau tu dikumbai ‘sakit’ ti diberi ngagai kontraktor baru tauka penyelamat, sereta di serata nengeri tu bisi urung 50 projek sakit.
“Aku ti kitu seharitu ngelai pengawa pemerati silik berengkah dipejalaika. Projek Jalai Matang Fasa 2 tu sebedau tu projek sakit, tang kami udah nyirika kontraktor baru neruska kereja ti agi tinggal,” ku Uggah.
Nitihka Uggah, iya sereta sapit menteri iya Dato Majang Renggi enggau Datuk Ir. Aidel Lariwoo, sereta Direktor Opis Kereja Raya (JKR) Dato Richard Tajan deka chakah agi bejalaika pengawa merati enggau ngabas projek ngena chara bebagi alai awakka ulih mayuh agi kandang endur ulih dilawa.
“Kami ngarapka ba bulan April ke deka datai, kami deka ulih meda pemansang kereja semua projek tu. Kami enggai ke projek sakit ti diberi ngagai kontraktor baru tang kontraktor nya mega nyadi ‘sakit’,” ku iya.
Nambah nya, Uggah mega ngingatka kontraktor baru mesti berengkah gawa pengudah sebulan taba projek diberi ngagai sida baka ti udah ditetapka JKR.
Iya madahka nyema kontraktor enda nitihka atur ti ditetapka, sida JKR ulih meri notis ngetu.
“Tu siti ari chara dipilih dikena kami nentuka projek infrastruktur deka tembu nitihka timpuh ti udah ditetapka,” ku iya.
Ngenang projek Jalai Matang Baru Fasa 2, Uggah madah diri puas ati meda pemansang projek nya.
“Projek berega RM4.5 juta ti dipelaba tembu ba bulan Mei 2024. Tu ungkup ngaga eggau nembika laluh kereja ngemanahka agi jalai nya.
“Ari dua lurung deka diubah nyadi empat lurung dua jalai ti panjai ia urung 4.44 kilometer. Diatu, 86 peratus dulu ari jadual.
“Taja pia bisi sekeda isu nyadi tang aku udah minta sida JKR enggau Sarawak Energy Berhad mutarka pekara nya enggau lengkas,” ku iya.