EU mai berita manah bekaul komoditi sebedau bulan Jun: Fadillah
Kesatuan Eropah (EU) deka madahka berita manah pasal pengawa nyadika industri bekaul enggau komoditi di menua tu lebih ngemeratka rampa menua ti meruan, enda lama agi.
Sapit Menteri Besai, Datuk Seri Fadillah Yusof madahka, pekara nya deka dipadah sebedau bulan Jun taun tu.
Nitihka iya, sebedau tu iya udah betemu enggau sida EU bekaul enggau pengawa ngaku Skim Pensijilan Minyak Sawit Mampan (MSPO) enggau pekebun mit ti tinggal ari pengawa meri kelala Peraturan Produk Bebas Penebangan Hutan Kesatuan Eropah (EUDR).
“Sida (EU) udah berati sereta pekara nya dipadah enda lama agi, iya nya pemesai renggat EU enda lama agi deka datai baru ke Malaysia.
“Sida madah iya nya pengari EU madah bisi peluang ti manah entara iya pekebun mit deka dijaga, MSPO deka diaku nyadi siti ari proses audit ungkup EUDR nya empu.
“Nya aku madah, kitai endang ngarapka pekara nya sereta kitai nganti berita manah nya,” ku iya.
Iya madahka pekara nya lebuh dirandau raban pengarang berita pengudah bejadi pengerami Nyuaka Getan Tiap Taun Komiti Pemansang enggau Pengelikun Genturung Pendiau (JKKK) Parlimen Petra Jaya ti diatur di Dewan Malaysia Jaya ditu, kemari.
Bejaku baru iya madahka, mayuh kereban ulih diasaika pengudah MSPO nya diaku.
“Nyema MSPO nya diaku, ia nadai proses audit ba tiap produk tauka syarikat ti ngeluarka produk bekaul enggau kelapa sawit, koko enggau kayu, iya nya enda nengah proses ti sama.
“Udah bisi reti enti udah bisi MSPO,” terang iya.
Dulu ari nya, Kaban Parlimen
Petra Jaya nya nyuaka sepenyampau RM255,000 ngagai 83 JKKK dalam sitak Parlimen nya ti nyengkaum tiga sitak Kunsil Nengeri (DUN) Tupong, DUN Satok enggau DUN Semariang.
Bejaku ba pengerami nya, Fadillah deka betemu enggau perintah lokal sereta ketuai genturung pendiau lalu berandauka langgur dikena mutarka penanggul bah dalam sitak nya.