Palam Penyangkai Kapal Bintulu nyungkak ekonomi Sarawak
Perintah besai, Sarawak udah besetuju ngenukuka pengawa meri pulai Palan Penyangkai Kapal Bintulu ngagai nengeri tu kena bulan Jun
BINTULU: Pengawa ngambi baru Palan Penyangkai Kapal Bintulu dipelabaka deka nyungkaak industri kapal di nengeri tu lalu mega ngenyakahka agi pengerembai ekonomi di menua tu, ku Premier Sarawak Datuk Patinggi Tan Sri Abang Johari Tun Openg.
Ku iya, naka diatu, perintah besai enggau Sarawak udah nyapai jaku setuju dalam ngenukuka pengawa meri pulai Palan Penyangkai Kapal Bintulu ngagai perintah Sarawak kena bulan Jun ti deka datai.
“Tu iya nya siti ari tikas pemanah ti beguna ungkup perintah Sarawak ke alai kitai mujur bulih baru hak nengeri tu iya nya palan penyangkai kapal ke diintu kitai lalu deka mantu dalam ngenyakahka agi ekonomi di nengeri tu kelebih agi dalam sektor palan penyangkai kapal,” ku iya nerang.
Iya madah munyi tu lebuh ti bejaku maya Pengerami Nerima Pengabang Taun
Baru China 2024 begulai enggau Parti Demokratik Progresif (PDP) ba dewan Suarah Bintulu kemari.
Ku iya, pemujur perintah Sarawak dalam ngulihka baru palan penyangkai kapal tu mega deka nentuka tu ulih diintu nyadi palan penyangkai kapal nengeri Sarawak ti sah.
“Enggau tanggungpengawa ti besai kelebih agi ungkup wilayah Sarawak deka nentuka palan penyangkai kapal tu nyadi palan penyangkai enggau perengka pengangkut ti beguna ba rantau Asia Tenggara,” ku iya.
Dalam jaku iya, Abang Joahri madahka iya nya Sarawak diatu ngembuan pemisi methanol ti dikena dalam industri kapal di nengeri tu.
Sarawak ku iya, ngembuan pemisi methanol diri empu ke alai industri kapal diatu enda ngena minyak tang methanol.
“Palan Sarawak iya nya strategik laban ba tengah Asia ke alai tetiap pengemeran industri kapal ari dalam enggau menua luar ngulihka pemisi methanol ari kitai,” ku iya.
Tu nyata langkar pemansang timpuh panjai dalam ngangkatka industri methanol laban palan bukai nyengkaum Singapura nadai ngembuan methanol.
Indonesia ku iya bisi methanol tang palan nya jauh lalu siti aja hab sida (pengemeran industri palan penyangkai kapal) ngulihka methanol iya nya di Bintulu.
Berindik ari tu, ku iya, pemansang loji methanol di Tanjung Kidurong nyadi palan ti engkeman maya nya lalu endang beguna dalam sektor industri.
Menteri Industri Pemakai, Komoditi enggau Pemansang Wilayah Sarawak Dato Sri Dr Stephen Rundi, Menteri Dagang Temuai, Seni enggau Main Asal Dato’ Seri Tiong King Sing enggau Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah entara ti bisi datai.
Enggau tanggungpengawa ti besai kelebih agi ungkup wilayah Sarawak deka nentuka palan penyangkai kapal tu nyadi palan penyangkai enggau perengka pengangkut ti beguna ba rantau Asia Tenggara.
Datuk Patinggi Tan Sri Abang Johari Tun Openg