Betong sedia nyadi bagi menua di Sarawak ti progresif, lantang agi
Betong besedia nyadi sebuah kandang menua tauka bagi menua di Sarawak ke progresif enggau lantang agi setipak enggau Strategi Pemansang Pengudah COVID-19 (PCDS) 2030, ku Sapit Premier Sarawak Datuk Amar Douglas Uggah Embas.
Ku iya madah, enggau strategi sereta program ari baruh Ejensi Pemansang Bagi Menua Betong (BDDA), rayat Betong deka ngasaika penatai pemisi enggau tikas pengidup ti manah agi.
“Pia mega, ketuai menua tu ti ngembuan pelin diri empu deka mantu enggau ngemuntangka transformasyen tu,” ku iya.
Iya madah munyi tu ba pengerami begempuru ungkup pengereja pengawa perintah Bagi Menua Betong di Dewan Tan Sri Stephen Kalong Ningkan di Betong, kena malam Hari Enam.
Taja pia Uggah madahka, isu rampa menua enda ulih diseliahka lebuh dalam nyapai pemansang enggau pengelantang ti besai agi di Betong.
“Deka bisi penambah umbang ari rumah enggau komersial ti diasilka. Kitai enda ulih semina bepanggai ngagai palan muai uras dalam mutarka pekara tu. Nya alai, aku berunding deka ngembuan insinerator di semua pasar besai ba bagi menua Betong.
“Berindik ari tu, siti aum deka diatur enda lama agi dalam mutarka pekara tu,” ku iya.
Iya deka Betong meruan gadung ukai semina dikena matak mayuh temuai tang mega nyadi bagi menua tauka kandang menua ti pemadu beresi di menua tu.
Beserimbai enggau tu, Uggah minta semua pengereja pengawa perintahdi bagi menua tu terus merika sukung, komitmen enggau kerejasama ti rat dalam nentuka visyen tu nyadi nyata.
“Sama begulai enggau pengeransing Segulai Sejalai,
kitai ulih nyapai tu,” ku iya.
Beserimbai enggau tu, Uggah madahka peranak Betong chukup betuah laban ngembuan rentayan jalai alun ti chukup komprehensif enggau bungkur bekal elekterik sereta ai ti nyau deka
chukup.
Ku iya, tu iya nya asil ari sukung ketuai ti duku baka ex-Sapit Kepala Menteri Tan Sri Datuk Patinggi Alfred Jabu.
“Diatu kitai deka ngenyukupka tu enggau ngemansangka program sereta aktiviti ekonomi dalam ngangkatka penatai pemisi.
“Kitai udah ngembuan raban ti bepenatai pemisi tinggi ditu ari raban pekebun sawit enggau lada.
“Tang kitai deka ngembuan mayuh agi raban bepenatai pemisi tinggi datai ba taun 2030 setipak enggau batang tuju PCDS 2030,” ku iya.
Nengah BDDA, Uggah ti mega Kaban Kunsil Nengeri (ADUN) Bukit Saban madah, mayuh peluang ti disediaka ungkup semua orang.
“Kitai diatu udah mantaika chara betanam betupi moden baka fertigasyen enggau ke bukai. Kitai deka nyadika Betong nyadi hab pemakai lalu kitai ngembuan dua taman agro di Bebuling enggau Lubok Tamang.
“Nyangka kitai patut ngaga sekeda agi. Pelilih Mit Spaoh udah diagihka ungkup projek nanam padi dua kali setaun.
“Kitai mega ngembuan perambu dalam neresa potensial dagang temuai enggau ngena memanah pengeraja asal kitai, budaya sereta mayuh macham enggau sejarah kitai nyengkaum bekaul enggau bujang berani Iban, Rentap ti tebilang,” ku iya nerang.
Iya ngarapka BDDA ulih ngasilka pelin besai dalam timuh dua taun ari diatu.
Beserimbai enggau tu, Uggah madahka sepenyampau RM16 juta udah diagihka dikena ngaga replika kubu Rentap di Bukit Sadok.
“Nya alai, aku ngarapka raban pengereja pengawa perintah ulih madahka ngagai rayat bekaul enggau program sereta aktiviti ari baruh PCDS 2030 enggau mega sama ngambi bagi dalam mayuh macham langkar pemansang,” ku iya.
Iya mega ngarapka palan hemodialisis baru ungkup Spaoh, Kabong enggau Beladin deka tembu ujung taun tu.
“Kitai udah nemu palan tu lalu ngagihka sepenyampau RM5 juta tetiap siti dalam pengawa ngaga tu,” ku iya.
Dulu ari tu, Sapit Menteri Nembiak, Lumba enggau Main enggau Pemansang Orang Dagang Dato Gerald Rentap Jabu dalam jaku pengelalu iya ngelalau raban pengereja pengawa perintah ngambika seruran proaktif kelebih agi dalam mutarka penanggul ti ditapi rayat.
“Tetiap iku bisi tanggungpengawa diri empu. Ngambika nyadi relevan, aram mih sama berunding panjai.
“Jadi mih pesereta ti aktif lalu ukai nya semina puas ati nyadi orang ti ngemata aja ke nganti dipadahka ari bala ketuai,” ku Rentap ti mega ADUN Layar.
Sama bisi datai Sapit Menteri Pemansang Orang Indu, Nembiak Mit enggau Pengelantang Komuniti Datuk Mohamad Razi Sitm ti mega ADUN Debak, Kaban Parlimen Betong Dr Richard Rapu, Kaban Parlimen Batang Lupar Mohd Shafizan Kepli enggau temuai dipebasa ke bukai.