Program ‘Kuching Car Free Morning’ inisiatif ngurangka karbon di Sarawak
KUCHING: Program ‘Kuching Car Free Morning’ nyukung pengawa perintah Sarawak ti deka nyadi nengeri kurang karbon lalu nadai karbon ba taun 2050.
Sapit Menteri Utiliti enggau Telekomunikasyen Datuk Dr Abdul Rahman Junaidi Tuanku Jaafar madahka inisiatif tu udah dipunka Dewan Bandaraya Kuching Utara (DBKU) kenyau ari taun 2021.
“Program Kuching Car Free Morning iya nya agenda besai DBKU dalam mantu perintah nyadika mengeri Kuching kurang karbon.
“Tu dimunka kenyau ari taun 2021 begulai enggau Universiti Malaysia Sarawak (UNIMAS) ke alai tuju DBKU iya nya mengeri kurang karbon enggau kampus kurang karbon ungkup UNIMAS.
“Inisiatif tu mega setipak enggaupengeransingSarawak nyadi nengeri kurang karbon enggau nadai karbon ba taun 2050,” ku iya lebuh ti ditanya maya program tu ti sama mega udah digulu Datuk Bandar Kuching Utara, Hilmy Othman.
Program Kuching Car Free Morning diatur maya Hari Minggu keterubah enggau ketiga ninting bulan ti ngaul jalai semanjai Padang Merdeka nyentuk ngagai Tugu Pahlawan.
Dalam pekara bukai, Dr Abdul Rahman madahka baka pengerami ngintu Ramadan ba taun ke udah, DBKU begulai enggau Majlis Bandaraya Kuching Selatan (MBKS) deka ngatur Bazar Ramadan di kandang menua diri taun tu.
Di DBKU ku iya, Bazar Ramadan deka dibuka ba tiga palan iya nya Satok, Sukma Ria enggau Semarak.
Taja pia, ku iya nambah, raban DBKU bisi nerima peminta ari peranak Kcuhing kelebih agi bala pedagang ngambika muka Bazar Ramadan ba palan diri empu ti bejual mimit aja.
“Kitai deka ngemendarka pedagang tu bejual lalu mesti ngasika penetap, nyaga pemeresi, enda nekul jalai lalu nitihka garis lalau Opis Pengerai,” ku iya.
Ungkup penerang ti silik bekaul enggau Bazar Ramadan, iya minta sida ti bekaul tau ngiga DBKU.