Rayat Sarawak seruran ngemeranka penyerakup, ngabang maya pengerami kelai kaul ti manah
SRI AMAN: Kaban Parlimen Sri Aman Datuk Seri Doris Sophia Brodie madah, udah nyadi budaya komuniti kitai kelebih agi di nengeri Sarawak ba tetiap pengerami hari besai ngatur pengawa ngabang ngagai pangan diri, kaban belayan enggau bala bakih.
Nitih ku iya, tu iya nya siti ari budaya ke endang nyelai lalu patut diteruska dalam nyamin penyerakup ti manah entara rayat pupu bansa.
“Penyerakup rayat pupu bansa di nengeri tu endang beguna ngagai kitai mansang ke mua. Baka ti ditemu semua, di nengeri Sarawak, kitai bisi mayuh bansa ke diau di selampur nengeri tu.
“Ngelama tu, kitai ulih diau begulai dalam penyerakup enggau pengelantang, kitai bebasaka jalai pengarap, budaya, adat bansa bukai. Pia mega kitai ngasaika nadai nyadi pengawa belaya entara raban bansa nyadi baka menua bukai. Nya alai, nengeri enggau menua kitai terus idup dalam pengelantang,” ku iya,.
Iya madah munyi tu lebuh ti bejaku maya bejadi Pengerami Ramah Tamah Taun Baru China enggau Bejadika Panggau Chap Goh Mei Renggat Bagi Menua Sri Aman ti diatur Gerempung
Soon Heng Simanggang ti diatur ba Tokong Ciyun, Tebing Sungai Batang Lupar ditu malam tadi.
Berindik ari tu, ku iya, rayat patut beterima kasih ngagai perintah laban ti ngembuan polisi ti manah entara rayat pupu bansa. Perintah Gabungan Parti Sarawak (GPS) endang ngemeranka pengawa ti enda bechiping dalam semua polisi enggau langkar pemansang.
“Semua raban bansa, mit tauka besai, semuadiberi peluang ke sama lalu nama ti dikearapka aku, penyerakup rayat ti manah ke diasaika kitai diatu ukai temu datai baka nya aja. Raban politik, bala ketuai, ketuai komuniti ti dulu, udah bepuluh taun ke udah endang bebednar, enda ngetu ngatur program berandau ngambika prinsip penyerakup meruan ba semua renggat komuniti enggau rayat di nengeri tu.
“Nya alai, penyereta opis enggau ejensi perintah sereta gerempung ukai dikuasa perintah (NGO) dalam mantu meri penegap enggau pengelandik ngatur aktiviti ti bepelasarka penyerakup dikena ngetanka pekara tu di menua tu endang chukup diberi basa ke besai,” ku iya nyemetak.
Beserimbai enggau tu, ku iya, dalam pengeransing ngemansangka Sri aman enggau kandang menua ngelingi, sebagi ari pekara ti pemadu beguna iya nya kerejasama entara semua raban.
“Kerejasama ti rat entara peranak di genturung pendiau enggau raban perintah, entara parti komponen GPS mega sama berat. Nya alai, aku minta ngagai semua JKKK (Komiti Pemansang enggau Pengelikun Genturung Pendiau), gerempung ke bisi ngambika bekerejasama enggau raban ngatur pengawa sereta ketuai parti politik di kandang menua tu. Aku minta semua raban enda sanggu betemu tauka ngeripot ngagai aku.
“Nyema penanggul ti dipadahka enda ulih diputar ba renggat kitai, kitai deka mai ngagai raban orang ti tinggi agi. Enggau chara ti manah, aku pechaya projek pemansang ti dilangkar kitai enggau opis perintah sereta ejensi perintah ke bukai ulih dipejalaika enggau manah, nitihka perambu enggau ke bukai,” ku iya nambah.
Sama bisi datai iya nya Sapit Chairman Gerempung Soon Heng Simganggang Temenggong Kueh Aik Seng, Sekretari Gerempung Gokaw Sze enggau kaban ke bukai.