Datuk Mutang endang engkeman nyadi Yang Dipertua Dewan Negara: Abdul Karim
Penemu dalam bidang undang-undang ti dikembuan Datuk Mutang Tagal nyadika iya orang ti setipak bendar nyadi Yang Dipertua Dewan Negara.
Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madahka taja pan Mutang udah lama ngetu ari politik tang peneleba enggau latih iya nyadi luya ulih meri awak ngagai iya ngiring Dewan Rakyat enggau manah.
“Taja pan Mutang udah lama ngetu ari politik,iya kala nyadi Ahli Yang Berhormat dalam taun 1980-an ngagai 1990-an enti enda salah ingat, iya bisi latar belakang ti setipak nyadi Yang Dipertua Dewan Negara,” ku iya seraya meri tabi puji enggau pengaga ati ngagai Mutang, ti udah dichiri nyadi Yang Dipertua Dewan Negara.
Abdul Karim madahka pekara nya lebuh dipinta penerang bekaul enggau Mutang dichiri nyadi Yang Dipertua Dewan Negara nyerumba aum pengarang berita filem ‘Raya Emas: Harta Suci Salako” ti diatur ba Restauran Muzium Budaya Borneo ditu, kemari.
Mutang asal ari Lawas ti dichirika nyadi Yang Dipertua Dewan Negara ke-20, nempa sejarah ba iya empu, iya nya pemesai tauka ketuai ti keterubah ari etnik Lun
Bawang mangku penuduk nya.
Mutang nganti Tun Dr. Wan Junaidi Tuanku Jaafar ti ngelengka penuduk nya berindik ari dichiri nyadi Yang di-Pertua Negeri Sarawak kena 26 Januari tu tadi.
Bejaku baru Abdul Karim madahka Mutang mai besai reti ngagai komuniti Dayak kelebih agi ngagai Orang Ulu.
“Mutang iya nya Dayak keterubah dichiri nyadi Yang Dipertua Dewan Negara. Tu basa besai diberi ngagai komuniti Dayak kelebih agi ngagai Orang Ulu tauka Lun Bawang,” ku Menteri Nembiak, Lumba enggau Main, sereta Pemansang Orang
Dagang nya.
Mutang, 69, kala nyadi Kaban Parlimen Bukit MAs ari taun 1982 ngagai 1990, ngembuan Master of Business Administration (MBA) ari Curtin University sereta diatu mangku sekeda penuduk, baka Presiden Dewan Perniagaan dan Industri Orang Ulu.
Kelimpah ari nya, Mutang mega penyanding penemu undang-undang Gerempung Lun Bawang Sarawak enggau Mandang Presiden Persekutuan Perniagaan Sarawak (SBF).
Mutang nyadi Ahli Dewan Negara berengjah ari 15 Februari 2024 ngagai 14 Februari 2027.