MTCP tetap mantu industri kreatif enggau seni pemerindang nengeri
KUCHING: Perintah Sarawak nengah Opis Menteri Dagang Temuai, Industri Kreatif enggau Seni Pemerindang (MTCP) tetap deka mantu industri kreatif enggau seni pemerindang nengeri tu taja pan industri tu bulih agih belanja ari perintah besai.
Menteri MTPC, Dato Sri Abdul Karim Rahman Hamzah madahka tiap taun opis menteri iya nerima ungkup belanja sepenyampau RM40 juta iya nya Dana Pemudahcara Warisan, Seni dan Kebudayaan dikena bejalaika promosyen enggau ngatur pengerami tauka program bekaul enggau industri kreatif, seni, budaya, lumba enggau main, sereta pemakai asal nengeri tu.
Nitihka iya, ngena agih belanj nya opis menteri ulih ngatur pengerami bekaul enggau muzik ba RWMF, Kuching Jazz Festival sereta Borneo Jazz kelimpah ari regata enggau kebukai.
“Kitai nemu pasal agih belanja ti bisi diberi sida perintah besai enggau nengeri. Tang kitai enda nyekat, nyema udah bulih ari perintah besai kitai (perintah nengeri) enda meri, enda baka nya, kitai (perintah besai - nengeri) sama mantu pangan diri.
“Nama ti pemadu beguna kitai deka sida produksi ti ngaga pengerami ulih bejalaika tanggungpengawa(perana) sida enggau manah laban pengujung iya, nya deka nguntungka industri nya empu, sereta kelimpah ari nya ulih meri impak ekonomi ari pengerami ke diatur sekalika filem, pemakai asal, seni pemerindang, pengerami muzik enggau ke bukai.
“Nya kebuh kitai (perintah nengeri) enda nyekat, sapa ti deka ngatur pengerami
tauka program tau datai ngagai opis menteri kami, ngisi pom sereta bisi komiti meda keretas kereja kita. Lalu Dana Pemudahcara tu mega nadai sekat (penyampau ke dipinta), taja pia dalam kitai ngemendar kitai deka ngemeratka pengerami tauka program nya ngelakuka Sarawak.
Menteri Nembiak, Lumba enggau Main, sereta Pemansang Orang Dagang nya madahka pekara nya dalam aum pengarang berita pengudah iya bejadi filem “Raya Emas: Harta Suci Salako’ ti diatur ba Restauran Muzium Budaya Borneo ditu, kemari.
Bekaul enggau filem nya, Abdul Karim temegah ati filem “Raya Emas: Harta Suci Salako’ nyadi ti keterubah di dunya mandang adat sereta budaya lrang Salako Sarawak ti deka dipandangka nyerumba Hari Malaysia 2024, 16 September.
Pengawa ngaga filem tu tembu ba bulan Januari tu tadi, sereta diatu ba renggat ‘post-production’.
Abdul Karim ngarapka nengah pengawa ngaga filem nya deka ulih ngerichahka
agi industri filem di Malaysia kelebih agi di Sarawak ti dtebilang tauka dikelala enggau pemayuh pesaka asal, budaya enggau lagenda asal.
“Filem tu digaga ditu di Sarawak, iya nya 80 peratus digaga di kandang menua Lundu. Pemanah rampa menua asal ti chukup ngemegahka enggau landskap Lundu ti manah dikearap ulih narit ati orang ti meda filem tu enggau deka ngasuh orang ti meda filem tu ngasaika ke diri empu penyelai Sarawak.
“Ngena filem ti baka tu, lagend asal Sarawak deka ulih terus tan sereta ditanka ngena pengawa ngaga filem awakka ulih diasai sereta dipeda semua komuniti nyengkaum rebak biak ti nyadi penampung menua jemah ila,” ku iya.
Sama bisi datai ba pengerami tu kemari ngarika komuniti Salako, Sekretari Politik ngagai Premier Sarawak Niponi Undek; Movie Excutive Producer, Winson Voon sereta raban pelakon nyengkaum Melissa Francis, Dunstan Lurther, Ahirine Ahirudin, Daniel Ackeem enggau sida bukai.