SUKMA 2024 nyadi ‘benchmark’ Sarawak ngatur Lumba, Main SEA
KUCHING: Lumba enggau Main Malaysia (SUKMA) 2024 ulih nyadi rangkat tanda tauka ‘bechmark’ ti manah ngagai Sarawak nyadi palan alai ngatur Lumba enggau Main SEA.
Menteri Nembiak, Lumba enggau Main, sereta Pemansang Orang Dagang, Dato Sri Abdul Karim Rahman Hamzah madahka, Sarawak dipilih alai ngatur SUKMA 2024 berindik ari ngembuan fasiliti lumba enggau main ti chukup, sereta fasiliti nya mega ulih dikena ngatur Sukan SEA.
Ku iya, Sukan SEA ulih diatur ba endur bukai, ukai semina di indu menua, sereta nyema di Malaysia ia ulih diatur sekalika di Kuala Lumpur, Kuching tauka Johor Bahru.
“Sukan SEA 2025 diatur di Thailand. Nyema di Malaysia, taja pekara tu bedau diputuska, udah tentu mega kitai (Sarawak) deka ngambi peluang nyadi pengatur (Sukan SEA) laban kitai bisi semua fasiliti, nya kebuah aku madah kitai udah ngemendarka pengawa ngaga , kitai bisi semua fasiliti ditu.
“SUKMA diatur taun tu ditu (Sarawak), tu ulih nyadi ‘benchmark’ ti manah (ngagai Sarawak nyadi pengatur Sukan SEA).
“Nya kebuah maya baum enggau pengatur SUKMA, kitai deka nentuka semua ‘tip top’, laban kelimpah ari kitai nyadi pengatur, kitai deka ke Opis Menteri Nembiak sereta Lumba enggau Main (KBS) Kuala Lumpur iya nya Sarawak ulih ngatur pengerami tikas antarabansa,” ku iya seraya madah kitai temegah ati enti Sukan SEA diatur di Sarawak.
Iya ditanya pekara nya nyerumba aum pengarang berita filem ‘Raya Emas: Harta Suci Salako’ ti diatur ba Restauran Muzium Budaya Borneo ditu, kemari.
Kelimpah ari nya ditanya bekaul enggau penemu iya ti ngarapka pekit World Boxing Championship (WBC) Asia diatur di nengeri tu, Abdul Karim madahka, arapka pekit tikas antarabansa nya diatur di Sarawak.
“Aku bisi madah ngagai Gerempung Tinju Sarawak, enti ulih pengerami tikas antarabansa nya diatur di Kuching tauka di Sarawak.
“Perintah nengeri tauka opis menteri aku sedia nyukung. Kitai besedia nulung, nya kebuah aku minta Datuk Rahman Lariwoo, Presiden Gerempung Tinju Sarawak, enti ulih (WBC) dibai kitu, iya benung ngatur nya.
“Laban pekit renggat antarabansa nya dipeda serata dunya kelimpah ari ti ukai semina siti match/perlawanan aja, selalu iya mayuh match/perlawan dalam siti timpuh. Nya alai, impak iya ditu ngagai publisiti enggau dagang temuai chukup manah,” ku Menteri Dagang Temuai, Industri Kreatid enggau Seni Pemerindang.