Pemidang niang Tun Taib pengelenyau besai ngagai menua, kelebih agi Sarawak
KUCHING: Pemidang Tun Pehin Sri Abdul Taib Mahmud, 87, Ex Tuai Pemegai Menua , ti digelar ‘Bapa Pemodenan Sarawak’ sereta mayuh udah mai pemaik ngagai menua, pengelenyau besai ukai semina diasaika Sarawak tang mega Malaysia.
Pemidang niang diasaika genap serak rayat nengeri tu ti ngasaika pemansang sereta ubah besai ke dibai iya nengah polisi politik pemansang maya nyadi pengiring menua, Kepala Menteri kenyau ari taun 1981.
Tun Taib madamka seput urung pukul 4.40 pagi kena 21 Februari 2024 di sebuah sepital peribit di Kuala Lumpur.
Kelimpah ari penerang berita, media rama nyadi medium besai bala pemesai ngenang enggau meri penyinu ati ke pemidang Ex Tuai Pemegai Menua, Pehin Sri Abdul Taib Mahmud, kemari.
Sapit Premier Sarawak, Datuk Amar Douglas Uggah Embas madahka pemidang Ex Tuai Pemegai Menua, Tun Pehin Sri Abdul Taib Mahmud iya nya pengelenyau besai ngagai Sarawak enggau menua.
Uggah madahka Tun Taib endang siku pemesai ti nusun sereta nyadi penengkebang menua moden ungkup Sarawak, kelimpah ari megai pengawa ti chukup besai lalu mai pemansang ngagai nengeri tu.
“Ba politik, Tun Pehin Sri chukup ngemegahka, iya mujur ngembing Sarawak nengah pengawa ngemeranka politik bebasaka pangan diri sereta nerenak ulah kerejasama ba rayat pupu bansa enggau jalai pengarap di Sarawak.
“Tun Pehin Sri mega nyaga pemaik sereta pengelantang enggau penyerakup ti diasaika kitai sehari tu. Timpai tauka visyen iya, deka ngemoden enggau ngemansangka Sarawak baka diatu endang seruran dikeingat.
“Kitai meri penyinu ati ngagai sida niang Tun Pehin Sri Abdul Taib Mahmud sebilik,” ku Menteri Infrastuktur enggau Pemnasang Penyangkai Kapal nengah penerang media.
DR SIM
Sapit Premier Sarawak, Datuk Amar Dr. Sim Kui Hian madahka niang Tun Pehin Sri Taib Mahmud siku orang ti mayuh meri sukung dalam servis pengerai kelebih agi Yayasan Jantung Sarawak.
Nengah penerang berita iya madahka, Tun Taib orang ti ngepun sereta megai tanggungpengawa mindahka servis berubat tungkul ati ari Sepital Besai Sarawak (HUS) ke Kota Samarahan, ti dipejalaika nengah Opis Menteri Pengerai Malaysia sereta ukai universiti ba taun 2001.
“Pengudah niang Datuk Amar Laila Taib (bini Taib) midang ba taun 2009, Tun nganti iya nyadi chairman Yayasan Jantung Sarawak enggau seruran mekuh ngagai chara mantu servis berubat tungkul ati di Pusat Jantung Sarawak enggau pesakit. Aku belajar mayuh ari langgur strategi Tun Taib maya baum Lembaga pengelama betaun-taun
“Pengelama 33 taun nyadi Kepala Menteri, Tun nempa ukai semina penegap politik (kelimpah Ming Court 1987), iya ngepun bekunsi politik ti ulih dipechaya enggau pemaik rama sereta jalai pengarap di Sarawak.
“Kelimpah ari politik pemansang di Sarawak, legasi Tun Taib iya nya parti politik Sarawak ti ngembing kediri empu Sarawak sereta ukai meri awak ngagai UMNO, MCA datai ke Sarawak,” ku
Menteri Pengerai Mensia Mayuh, Pengawa Berumah enggau Perintah Lokal seraya madah pemidang Tun Taib siti agi pengelenyau anak Sarawak ti tebangkar.
Sapit Menteri Besai, Datuk Seri Fadillah Yusof madahka, pemidang Tun Taib endang pengelenyau besai ukai semina ngagai Sarawak tang mega menua.
Kaban Parlimen Petra Jaya madahka niang nya kala nyadi Menteri ba renggat perintah besai sebedau pulai ke Sarawak.
“Berasai sinu ke pemidang Negarawan, Tun Pehin Sri Abdul Taib Mahmud, Ex Tuai Pemegai Menua enggau Ex Kepala Menteri, tumu pagi tadi (kemari) di sebuah sepital di Kuala Lumpur.
“Pemidang niang pengelenyau besai ukai semina ngagai Sarawak tang mega menua. Niang kala gawa nyadi Menteri ba renggat perintah besai sebedau pulai ke Sarawak,” ku iya meri penerang nengah Facebook iya, kemari.
Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah
madahka, Tun Taib siku pemesai ti nyadika pugu penyerakup dalam pupu bansa enggau jalai pengarap di Sarawak, pemansang fizikal enggau rayat, sereta ngenegapka orang indu.
“Pemidang siku Negarawan, pemesai tebilang menua. Pemesai ti udah nyadika pugu tegap penyerakup dalam pemayuh (bansa enggau jalai pengarap) di Sarawak, pemansang fizikal enggau rayat, sereta ngenegapka orang indu,” ku iya nengah penerang berita.
Sapit Menteri ba Opis Premier Sarawak (UndangUndang, MA63 enggau Kaul Sarawak - Perintah Besai) Datuk Sharifah Hasidah Sayeed Aman Ghazali madahka pemidang Tun Taib hari ti ngenyinuka ati rayat Sarawak.
“Besampika semengat Tun diberkat Allah sereta begulai enggau orang ti tuchi.
“Kelalu mayuh pemanah/ jasa Tun ngagai Sarawak. Pemanah nuan Tun tetap dikenang,” ku iya nengah Facebook iya.
Sapit Menteri ba Opis Premier Sarawak (Integriti enggau Ombudsman) Dato Dr. Juanda Jaya madahka Tanah Kenyalang lenyau pemesai ti chukup berjasa.
Ku iya, Tun Taib chakah dalam pengawa politik enggau pengawa meri diri ngagai Ibu Pertiwi kenyau ari Sarawak bisi ba taun 1963.
“Iya ti gawa nyadi ‘khadam’
rayat Sarawak dalam mayuh bengkah kapasiti genap lebih 60 taun (19632024) nadai ngetu. Enyau deka sepemanjai umur iya (1936 - 2024) didedikasyen iya ngagai Sarawak ke diatu majak ti Maju Makmur. Sejarah deka nisih iya nyadi Bapa Sarawak ke amat,” ku iya nengah Faceebook.
Niang datai di Padang Bilun Antarabansa Kuching urung pukul 4.25 lemai dibai ngena bilun Tentera Udara Diraja Malaysia (TUDM) Charlie 130.
NANCY
Menteri Pemansang Indu, Ruang Bilik enggau Komuniti, Datuk Seri Nancy Shukri ngenang madahka, Tun Taib orang ti keterubah ngajar iya masuk bidang politik iya nya nyadi Kaban Parlimen dalam urung taun 2008.
“Ari aku empu, pekara seruran dikingat iya nya niang orang keterubah ngajar aku dalam masuk bidang politik iya nya nyadi Kaban Parlimen ba urung taun 2008. Semina Allah aja ulih malas semua pemanah enggau sukung niang.
“Pemidang Tun Taib pengelenyau siku tokoh Negarawan enggau Bapa Pemodenan Sarawak. Pemidang niang mega pengelenyau besai ukai semina Sarawak tang mega diasaika menua.
“Niang sepemanjai ke idup endang meri diri ngemansang enggau ngelantangka Sarawak,” ku Kaban Parlimen Santubong nya.
Udah nya niang lalu dibai sereta datai di rumah iya di Demak Jaya urung pukul 5.11 lemai. Sama nganti penatai di rumah iya nya bala anak niang, kaban belayan enggau bala pemesai nengeri.
Sama bisi datai nyempulang niang ari Padang Bilun Antarabansa Kuching iya nya Premier Sarawak Datuk Patinggi Tan Sri Abang Johari Tun Openg, Sapit Premier Sarawak Datuk Amar Awang Tengah Ali Hasan, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah, Sekretari Perintah Nengeri Datuk Amar Mohamad Abu Bakar Marzuki sereta bala pemesai ke bukai.
Pagi tu, 22 Februari 2024, niang dibai ngagai Kunsil Nengeri (DUN) kena meri awak ngagai rayat meri basa kepenudi ngagai iya ari pukul 8 pagi ngagai 11.30 pagi.
Udah nya, niang dibai ke Masjid Demak deka disembiang sebedau dikuburka ngena chara ‘Istiadat Pengkebumian Negeri ‘ ba tanah pendam diri sebilik di Demak jaya.
Perintah nengeri netapka Sarawak dua hari ngulit berengkah kemari nyentuk ke sehari tu, sereta bendera Sarawak digitang setengan tiang di serata nengeri.
Tun Taib berengkah nyadi Tuai Pemegai Menua Sarawak ke-7 nganti Datuk Patinggi Tun Abang Muhammad Salahuddin ti ngetu mangku pengawa nya kena 28 Februari 2014.
Tun Taib nyadi Tuai Pemegai Menua berengkah ari 1 Mac 2014 ngagai 26 Januari 2024.
Iya Kepala Menteri Sarawak ke-4 ba pengelama 33 taun berengkah ari bulan Mac 1981 nyentuk bulan Februari 2014 ti lalu ngujungka iya nyadi kepala menteri tauka menteri besar ti pemadu lama megai pengawa nya di Malaysia.
Tun Taib berengkah besekula ba Sekolah Rendah St Joseph di Miri, udah nya ba Sekolah Menengah St Joseph di Kuching.
Ba taun 1958, berindik ari teulihka pemutus ti manah ba peresa Senior Cambridge iya lalu bulih skolarsip Shell sereta udah nya nampung pelajar iya ngagai Universiti Adelaide di Australia Selatan.
Iya bulih degree keterubah dalam bidang undang-undang ba taun 1960.
Tun Taib berengkah dalam pengawa politik lebuh iya mulaika diri ke Sarawak sereta gawa ba Crown Council ari taun 1962 nyentuk ke taun 1963.
Iya masuk dalam Majlis Perundangan Negeri Sarawak kena 22 Julai 1963.
Ari taun 1963 ngagai 1966 iya dichiri nyadi Menteri Komunikesyen enggau Kereja Raya Nengeri, sereta nyadi Menteri Pemansang enggau Pekara Kampung ba taun 1967.
Nambah nya iya kala mangku pengawa nyadi Sapit Menteri ba Perintah Besai ungkup pengawa dagang enggau industri ari taun 1968 ngagai 1970.
Ba politik iya nyadi mandal chairman Parti Berjasa Sarawak dalam taun 1964.
Iya ngarika Parti Bumiputera Sarawak (BUMIPUTERA), siti ari parti komponen Perikatan Sarawak ba pengawa bepilih Malaysia 1969.
Ba pengawa bepilih besai parlimen Sarawak taun 1970, iya dipilih nyadi kaban parlimen ba sitak parlimen Kota Samarahan.
Udah nya iya dipaduka megai mayuh bengkah portfolio nyengkaum Sapit Menteri ba Opis Menteri Besai (19701972) enggau Menteri Penatai Pengeraja Asal(1972-1974).
Ba taun 1973, iya nyadi sapit presiden PBB ti baru ditumbuhka dalam taun nya lalu nangkan ke nya dipaduka nyadi presiden parti.
Tun Taib jadi enggau Puan Sri Laila Taib bansa Poland ke udah midang kena 29 April 2009 ketegal riman sekumbang 50 taun seduai iya ke udah negika ruang bilik.
Seduai iya bisi empat iku anak iya nya Datuk Seri Sulaiman Abdul Rahman, Datuk Seri Mahmud Abu Bekir, Jamilah Taib Murray enggau Datuk Hanifah Hajar.
Kena 18 Disember 2010, Tun Taib bebini ke-2 kali enggau Toh Puan Datuk Patinggi Ragad Kurdi Taib.