Niang Tun Taib meretika sukung gerija, sekula misyen di Sarawak
Niang mega ulih begulai enggau rayat enda ngira jalai pengarap, etnik
“Iya ngembuan kaul ti manah enggau rayat enda ngira bida jalai pengarap enggau latar belakang etnik, nya alai niang tu endang bakih ti manah ngagai gerija.” Rt. Revd Datuk Danald Jute Chairman Gerempung Gerija-Gerija di Sarawak (ACS)
KUCHING: Tuai Pemegai Menua enggau Kepala Menteri ke dulu suba Tun Pehin Sri Abdul Taib Mahmud meretika sukung gerija enggau sekula misyen di nengeri tu.
Chairman Gerempung Gerija-Gerija di Sarawak (ACS) Rt. Revd Datuk Danald Jute madahka niang nya ulih begulai enggau rayat enda ngira jalai pengarap enggau etnik di nengeri tu.
Berindik ari nya , iya ngarapka bala pemesai ulih terus mai pemaik enggau pengelantang ngagai nengeri tu.
“Iya (niang Tun Taib) datai tauka ngelawa sekula misyen. Iya ulih nemu pemesai guna gerija enggau mega sekula misyen.
“Iya ngembuan kaul ti manah enggau rayat enda ngira bida jalai pengarap enggau latar belakang etnik, nya alai niang tu endang bakih ti
manah ngagai gerija,” ku iya dirandau pengudah meri basa kepenudi ngagai niang Tun Taib maya ‘Istiadat Penghormatan Negeri’ ngagai Tuai pemegai Menya ke dulu suba Tun Pehin Sri Abdul Taib Mahmud ti diatur ba Atrium Kunsil Nengeri (DUN) ditu, kemari.
Tun Taib, 87, midang pukul 4.40 pagi kena 21
Februari 2024 pengudah diperubat urung seminggu ba sebuah sepital di Kuala Lumpur.
Dulu ari nya Danald ti mega Bishop Gerija Anglika di Sarawak enggau Brunei madahka pemidang niang nya pengelenyau besai ngagai nengeri tu.
Ku iya, taja pan tiap iku orang bisi penemu ti bebida tang niang nya tetap siku pemesai ti spesil maya nyadi menteri, kepala menteri enggau tuai pemegai menua.
“Ari sukut pemansang enda ulih dikeenggai iya mai mayuh pemansang ngagai nengeri tu, nya endang patut diaku.
“Kitai ngarapka pemesai ke diatu enggau jemah ila deka ngemeratka jauh agi ngambika pemansang, semua hak nengeri dikunsi sebela ba semua orang.
“Kitai besampika nengeri kitai bulih pemanah jemah ila ari sukut pemesai ke ngiring kitai ngambika kitai ulih terus ngasaika pemanah ba nengeri Sarawak ti disayau kitai,” ku iya.