Niang Tun Taib mujur ditumbak ba Tanah Perkuburan Keluarga di Demak Jaya kemari
KUCHING: Tuai Pemegai Menua ke dulu suba niang Tun Pehin Sri Abdul Taib Mahmud mujur dikuburka sepiak enggau kubur bini keterubah iya niang Datuk Patinggi Puan Sri Laila Taib, urung pukul 2.20 lemai ba Tanah Perkuburan Keluarga di Demak Jaya, Jalai Bako ditu, kemari.
Maya nguburka niang, hari ujan baka ti nyempulang penyinu orang ke sebilik enggau niang, kaban belayan, bala bakih sereta bala pemesai ti datai enggau nguburka niang.
Atur pengawa nguburka niang diatur pengudah tembu sembiang solat Zohor.
Sama bisi datai meri basa kepenudi sebedau niang dikuburka iya nya Kebawah Duli Yang Maha Mulia, Paduka Seri Baginda Sultan Brunei Darussalam, Sultan Hassanal Bolkiah disempulang Paduka Seri Pengiran Muda Abdul Mateen ba Masjid Demak nya, kelimpah ari disempulang bala pemesai kabinet Sarawak.
Sebedau nya, rayat ari mayuh genap serak raban bansa bisi datai meri basa kepenudi ngagai niang Tun Taib nyerumba ‘Istiadat Penghormatan Negeri diatur ba Atrium Kompleks DUN ditu ari pukul 8 pagi ngagai 11.30 pagi sebedau niang dibai sereta dikuburka ba Tanah Perkuburan Keluarga di Demak Jaya, Jalan Bako.
Yang di-Pertua Negeri Tun Dr Wan Junaidi Tuanku Jaafar enggau bini iya Toh Puan Fauziah Mohd Sanusi entara ti bisi datai meri basa kepenudi
Dulu ari nya, Premier Sarawak Datuk Patinggi Tan Sri Abang Johari Tun Openg datai disempulang bini iya Puan Sri Datuk Amar Juma’ani Tuanku Bujang mega datai meri basa kepenudi.
Bala menteri kabinet, bala Kaban Kunsil Nengeri, bala Kaban Parlimen, ketuai opis
perintah sereta bala pemesai bukai sama bisi datai meri basa kepenudi ngagai niang Tun Taib.
Toh Puan Datuk Patinggi Ragad Kurdi Taib sereta sida sbilik enggau kaban belayan niang Tun Taib dipeda sinu maya nerima jaku penyinu ati ari semua ke datai.
Tembu Istiadat nya, niang Tun Taib dibai ari DUN ke Masjid Demak seraya meriam bisi ditimbakka sepemanjai pejalai berengkah ari Kubu Margherita.
Tun Taib, 87, madamka seput urung pukul 4.40 pagi kena 21 Februari 2024
di sebuah sepital di Kuala Lumpur , sereta niang dibai pulai ke Sarawak ngena bilun Tentera Udara Diraja Malaysia (TUDM) Charlie 130 Hercules.
Bilun ke mai niang nya mupuk ari TUDM Subang sereta datai ba Padang Bilun Antarabansa Kuching urung pukul 4.25 lemai 21 Februari, pengudah nerima basa kepenudi ari bala pemesai menua di Masjid Negara, Kuala Lumpur.
Niang Tun Taib maya datai di Kuching terus dibai ngagai rumah iya di Demak Jaya, Jalai Bako.