Pemansang kandang menua pesisir Sarawak seruran dikemeratka niang Tun Taib
Datuk William Nyallau Badak ti kala nyadi Kaban Parlimen Lubok Antu bekunsi pengingat madah niang Tun Pehin Sri Abdul Taib Mahmud, Tuai Pemegai Menua (TYT) enggau Kepala Menteri ke dulu suba, siku pemesai ti keran deka ngemansangka nengeri tu.
Nyallau ngingatka maya kala nyadi Residen di Bintulu sereta maya nya niang nyadi chairman Autoriti Pemansang Bintulu (BDA), ku iya, Tun Taib keran deka ngemansangka menua Bintulu seraya deka nyendiaka peluang gawa ngagai rayat Sarawak.
“Siti ke dikeingat ke aku, maya aku nyadi Residen di Bintulu suba sereta iya (Tun Taib) maya nya suba nyadi chairman Autoriti Pemansang Bintulu mayuh utai diajar, iya deka ngemansangka menua tu.
“Iya (Tun Taib keran) deka ngemansangka menua Bintulu awakka maju sereta mayuh alai rayat kitai Sarawak kereja. Nya utai dikeingat aku maya begulai enggau iya, maya bisi baum enggau iya,” ku Nyallau lebuh dirandau ba ‘Istiadat Penghormatan Negeri ‘ ngagai Tuai Pemegai Menua ke dulu suba Tun Pehin Sri Abdul Taib Mahmud, ti diatur ba Atrium Kunsil Nengeri (DUN) ditu, kemari.
Nambah nya, Nyallau ti Kaban Parlimen Lubok Antu maya niang nyadi kepala menteri suba madahka Tun Taib mega enda ninggal menua pesisir baka Lubok Antu ari sukut pemansang.
“Maya aku nyadi Kaban Parlimen, iya mega mayuh nulung menua Lubok Antu.
“Suba aku minta ngambika gerija digaga (di sitak parlimen ke diarika aku), lebuh maya nya suba iya meri urung RM200,000 dikena ngaga Gerija St Philip Lubok Antu,” ku iya.
Nambah nya, Datuk Peter Nansian Ngusi, Kaban Kunsil Nengeri (ADUN) Tasik Biru ke dulu suba lebuh dirandau pengudah meri basa kepenudi ngagai Tun Taib madah kediri amat betuah gawa ke rayat maya niang nyadi kepala menteri.
Ku Nansian, iya mayuh belajar ari niang kelebih agi bekaul enggau pemansang politik di nengeri tu
Iya madahka niang nya siku orang ke bisi juluk ati sereta mai penegap ke nengeri tu.
“Aku ngasaika diri amat betuah bejalaika pengawa ari baru iya (niang Tun Taib) laban aku mayuh belajar sereta aku amat beterima kasih nga
gai chara iya ngemansangka nengeri kitai.
“Sechara personal, aku beterima kasih laban iya siku orang ti ngemansangka aku dalam politik sereta iya mai aku nuju ngagai chara ti signifikan. Iya nyadika aku gawa pengealam 20 taun dalam politik, nya alai aku mesti beterima kasih ngagai iya,” ku iya ti kala nyadi Menteri Muda Pemansang Estet Industri ari baruh iring Tun Taib ti nyadi kepala menteri suba.
Bekaul enggau komuniti Bidayuh, Nansian madahka niang mayuh mantu ngemansangka kandang menua Bidayuh nyengkaum ngemansangka tanah ari baruh SALCRA.
“Mayuh pekara tauka pemansang ti signifikan udah digaga iya ba kandang menua Bidayuh, ke ulih dipeda kitai diatu. Kitai ngarapka udah tu mega mayuh agi pemansang dalam komuniti kitai ti ukai semina pemansang fizikal tang mega aspek runding.
“Udah tentu mega kitai gaga ati ngagai pemesai e nampung niang tu, sereta diatu ti ditampung Premier Sarawak ke mayuh mai pemansang, nambahka penatai pemisi nengeri, nyadika nengeri belimpah betuah, progresif enggau tegap,” ku iya.
Kelimpah ari nya, kaban Parlimen Serian Dato Sri Richard Riot pemidang niang Tun Taib pengelenyau besai ngagai nengeri tu.
“Pemidang niang tu endang hari ti chukup sinu dalam sejarah Sarawak. Kelalu mayuh ti udah digaga iya ungkup Sarawak, kelalu mayuh enti dikingatka.
“Iya apai ngagai semua ba pekara ti nyadi ba Sarawak, utai ke nyadi sehari tu ketegal iya,” ku Riot dikerandau pengudah meri basa kepenudi ngagai niang kemari.
Tun Taib, 87, midang pukul 4.40 pagi kena 21 Februari 2024 pengudah diperubat urung seminggu ba sebuah sepital di Kuala Lumpur.