Petronas, perintah Sarawak besaup nyendiaka fasiliti pengerai nyengkaum di menua pesisir
SADONG JAYA: Petroliam Nasional Berhad (Petronas) bejalaika tanggungpengawa begulai enggau perintah Sarawak nyendiaka fasiliti pengerai kelebih agi di klinik pengerai menua pesisir di serata nengeri.
Senior Manija Petronas Sarawak Norazibah M Rabu madahka, perintah Sarawak sebedau tu mega minta bantu ari Petronas kena ngemanahka agi servis enggau infrastruktur klinik pengerai menua pesisir di Sarawak ba taun 2020.
Nitihka iya, Petronas enda kakang mantu laban nemu peranak di kandang menua pesisir udah lama kurang sistem penyaga tauka pengintu ti bekualiti.
“Pengudah berandauka silik pekara nya, Petronas ngaga pemutus nyendiaka ungkup belanja sepenyampau RM1.3 juta kena ngulihka ubat ungkup palan perubat di Sarawak.
“Entara kereban perubat ti dipelanja iya nya ‘multiparameter patient monitor,’
‘fetal doppler,’ ‘dandheld pulse oximeter’ enggau ti bukai,” ku iya.
Norazibah lebuh bejaku ba pengerami ‘Penyerahan Keperluan Perubatan Asas dari Petronas dan Sarawak Badan Amal Tenaga Isteriisteri (SABATI)’, di Klinik Pengerai Sadong Jaya ditu, kemari.
Bisi datai sereta bejadi pengerami nya Sapit Premier Sarawak Datuk Amar Dr Sim
Kui Hian.
Norazibah nerangka, program ke sekali tu begulai enggau bakih kunsi iya nya ari SABATI, ti lalu ngangkatka pengawa nyaga pengerai di menua pesisir Sarawak.
Nya alai iya ngarapka program baka nya ti dipejalaika begulai enggau SABATI sereta OpisPengeraiNengeriSarawak ulih mantu ngelempung pemerat ti diasaika peranak di menua pesisir Sarawak.
Sama datai, Sapit Menteri Infrastruktur enggau Pemansang Penyangkai Kapal Sarawak ti mega Kaban Kunsil Nengeri (ADUN) Sadong Jaya, Datuk Ir Aidel Lariwoo; Kaban Parlimen Batang Sadong, Rodiyah Sapiee; Sapit Presiden ti mega Sekretari Dibasa SABATI Datin Amar Enn Ong Siok Ean; Direktor Opis Pengerai Nengeri Sarawak Dr Veronica Lugah sereta temuai bukai.