Sarawak beguna mayuh agi mesin mamografi, ku Dr Sim
SADONG JAYA: Sarawak begunaka mesin mamografi tambah di sepital perintah kena ngangkatka pengulih nyidi tauka nemu bagi pesakit riman tusu di serata nengeri.
Sapit Premier Sarawak, Datuk Amar Dr Sim Kui Hian madahka, Sarawak semina bisi empat mesin nya di fasiliti pengerai perintah, tang siti ati mesin nya enda ulih dikena.
Nitihka iya, urung 52 peratus pesakit riman nya nyadi ba raban orang indu ti ukai semina ke diau di kandang mengeri tang mega nyengkaum sida ke diau di menua pesisir.
“Sarawak jauh tinggal ba fasiliti pengerai sereta nya kebuah, Sarawak minta hak autonomi bekaul pengerai di
Sarawak ari perintah besai.
“Tu kena ngemudahka Sarawak nemu dini fasiliti nya disediaka sereta fasiliti pengerai mensia mayuh di nengeri tu semina bisi empat mesin mamografi, tang siti ari mesin nya jai.
“Tu ngujungka pengulih servis pengerai ba pengawa nyidi penyakit nya kurang ngemuaska ati,” ku iya.
Iya madahka pekara nya maya dirandau raban pengarang berita pengudah bejadi pengerami ‘Penyerahan Keperluan Perubatan Asas daripada Petroliam Nasional Berhad (Petronas) dan Sarawak Badan Amal Tenaga Isteri-isteri (SABATI)’ di Klinik Pengerai Sadong Jaya ditu, kemari.
Menteri Pengerai Mensia
Mayuh, Pengawa Berumah enggau Perintah Lokal nya madahka, mesin nya bisi di Sibu, Kuching, Miri enggau Bintulu.
“Mesin ke jai nya di Bintulu, sereta agi nganti diaduka baru,” terang iya.
Sama bisi datai, Sapit Menteri Infrastruktur enggau Pemansang Penyangkai Kapal Sarawak ti mega Kaban Kunsil Nengeri (ADUN) Sadong Jaya, Datuk Ir Aidel Lariwoo; Kaban Parlimen Batang Sadong Rodiyah Sapiee; Sapit Presiden ti mega Sekretari Dibasa SABATI Datin Amar Enn Ong Siok Ean; Direktor Opis Pengerai Nengeri Sarawak Dr Veronica Lugah, Senior Manija Petronas Norazibah M Rabu enggau temuai bukai.