Malaysia tegap nyadi palan dagang temuai besai dilawa di Asia Tenggara
Malaysia mujur ngetanka penuduk nyadi palan dagang temuai besai suah dilawa di Asia Tenggara taja pan betapi enggau mayuh penguji, ku Menteri Dagang Temuai, Seni enggau Main Asal, Datuk Seri Tiong King Sing.
Kaban Parlimen Bintulu nya madahka, taja pan proses mulaika pemanah sektor nya begunaka timpuh lama pengudah balat tekeruga ketegal pandemik COVID-19 nyadi serata dunya kenyau tiga taun ti udah, ia majak manah pengudah pintu penama ke menua enggau luar menua dibuka baru.
“Kena nyapai tuju nya, Opis Menteri Dagang Temuai, Seni enggau Main Asal (MOTAC) chakah bejalaika tanggungpengawa kena ngangkatka baru sektor dagang temuai Malaysia dikena nentuka palan ti manah di menua tu terus ditapat baka sebedau tu,” ku iya dalam sebengkah penerang, kemari.
Tiong madahka, berengkah taun nyin kemari iya nya maya mulaika pemanah, MOTAC betapi enggau penguji berat, tang opis menteri terus chakah nempa kerejasama enggau ejensi ti bekaul lalu mujur matak penatai mayuh temuai nyengkaum orang ke raun ari luar menua ke Malaysia ti udah ngerikotka penatai pemadu tinggi di kandang menua tu.
Ku Tiong, maya ngintu pengerami Taun Baru, bisi penyedar iya nya pengeran enggau kerejasama ti lebih besai ari raban pengereja pengawa opis menteri amat diguna.
“Aku minta semua pengeraja pengawa MOTAC enggau ejensi dipegai opis menteri terus komited sereta besaup ngangkatka baru sektor ekonomi dagang temuai di menua tu ke pemanah semua orang nyengkaum pengemeran dagang temuai enggau rayat kelebih agi,” terang iya.
Iya madahka, dikearapka ba taun 2024 semua ti ngambi bagi dalam sektor dagang temuai ulih sama nyingkang ke mua ngena pemerani tauka pengandal ti lalu terus mai industri dagang temuai ngagai tikas baru kena nyapai lebih mayuh penyulut.