Uggah nyukung teknologi baru dalam industri lada
Teknologi baru deka nyadi penyangga pengidup baru pekebun dalam industri lada
KUCHING: Sapit Premier Sarawak, Datuk Amar Douglas Uggah Embas nyukung pemansang enggau pengawa ngemeranka teknologi baru dalam industri lada.
Nitihka Uggah, Ketuai Direktor Opis Lada Malaysia (MPB) Vincent Sarawak bisi madah sida iya deka ngamatka pengawa ngena teknologi baru nya.
”MPB ambika chunto, bisi bejalaika projek pemungkal ngena aplikasyen Internet of Things (IoT) enggau chara moden baka fertigasyen di Semengok, Kuching enggau di Sarikei.
”Industri tu (lada) amat beguna ngagai nengeri enggau pekebun menua pesisir ti endang udah lama bepanggai ba komoditi tu kena ngulihka penatai pemisi,” ku iya ti mega Menteri Pekara Wang enggau Ekonomi Baru Kedua.
Uggah madahka pekara nya ngagai pengarang berita pengudah bejadi randau Pemansang Industri Lada ti diatur di Rh Joseph Sanda di Jambu Kerampak, Layar, di Betong, kemari.
Bejaku baru Uggah madahka, teknologi baru nya deka nyadi penyangga pengidup baru industri.
”Baka ti dipadah ngagai aku pasal teknologi baru, pekebun dipelaba ulih ngumpul urung empat kilogram ba tiap pun lada dibandingka enggau pukul rata diatu.
”Tu ulih matak pekebun biak baru ke deka nanam tauka numbuhka baru,” ku iya.
Berebak enggau tu, iya madahka Ejensi Pemansang Bagi Menua Betong (BDDA) udah ngungkupka sepenyampau RM3 juta kena mantu pemansang industri nya di Betong.
Kaban Kunsil Nengeri (ADUN) Bukit Saban nya mega madahka, nya dikena mantu MPB enggau Opis Betanam Betupi ba pekara nya.
”Kitai deka meransang mayuh agi orang biak baru numbuhka lada. Sida ulih numbuh ngena chara baru awakka ulih ngasilka kualiti ti lebih manah enggau kuantiti ti mayuh agi,” ku iya.
Nambah nya iya madahka, pekebun ke diatu mega dibantu kelebih agi bekaul
enggau rega makit lada dikena nentuka sida ulih ngetanka kebun sida.
”Ba sitak ti diarika aku, lada agi nyadi komoditi ti pemadu beguna. Iya udah nyendia enggau terus meri pekebun
penatai pemisi lalu bisi ke belanja tiap hari,” ku iya.
Lebuh bejaku ba pengerami nya, Menteri Infrastruktur enggau Pemansang Penyangkai Kapal nya minta MPB nyendiaka sistem sukung bekaul enggau rega lada.
Ku iya, nya ngambika pekebun ti bekaul bulih penatai pemisi enti rega komoditi nya nurun di makit, seraya ulih mantu ekonomi menua.
Bepelasarka statistik MPB, Sarawak pengeluar lada pemadu besai di menua tu, iya nya urung 38, 277 pekebun ti nanam lada ba urung 8,015 hektar tanah.
Sarawak taun nyin kemari ngeluarka 31,900 tan metrik lada, sereta bagi menua Betong entara pengeluar pemadu mayuh enggau penyampau 2,338 kebun ti nanam laba ba pemesai 659.7 hektar tanah.
Ba pengerami ti sama, Uggah bisi nyuaka geran MPB sepenyampau RM1.737 juta ngagai mayuh kategori pekebun enggau pengeluar lada.
Bisi ngulu pengerami nya, Menteri Industri Pemakai, Komoditi enggau Pemansang Wilyah, Dato Sri Dr. Stephen Rundi Utom enggau Kaban Parlimen Betong, Dr Richard Rapu.
Industri tu (lada) amat beguna ngagai nengeri enggau pekebun menua pesisir ti endang udah lama bepanggai ba komoditi tu kena ngulihka penatai pemisi.