Taman rekreasyen 60 ekar digaga dalam DUN Batu Kawa, ku Dr Sim
KUCHING: Taman rekreasyen pemesai 60 ekar dilanggur digaga dalam kandang endur Kunsil Nengeri (DUN) Batu Kawa.
Sapit Premier Sarawak, Datuk Amar Dr. Sim Kui Hian madahka, nya entara ubah tauka transformasyen pemansang enggau ulih nyadi dagang temuai ti deka nguntungka ekonomi peranak ba endur nya.
“Sebuah balai mayuh guna ari baruh fasa tauka renggat keterubah Projek Rejuvenasi Kuari Ang Cheng Ho ti pemesai 20 ekar udah tembu digaga taun nyin kemari.
“Tanah pemesai 20 ekar tu ari baruh perintah Sarawak. Tang, kandang endur ke ngelinggi nya dikempu individu tauka kompeni swasta iya nya kitai merambu deka ngaga taman rekreasyen mensia mayuh ba pemesai 40 ekar nuju ke Emart Batu Kawa ditu,” ku iya.
Iya madahka pekara nya lebuh dirandau raban pengarang berita ba pengerami Tuai Begulai enggau Rayat nyerumba Taun Baru China
(TBC) DUN Batu Kawa ti bisi digulu lebih 500 iku peranak ke diatur ba Balai Mayuh Guna Ang Cheng Ho ditu, kemari.
Bekaul enggau pekara nya, Dr. Sim madahka perintah deka berandau enggau kompeni swasta nya ngambika langgur nya ulih dipejalaika.
“Nyema sida setuju, kitai udah tentu ulih ngemajuka kandang endur ti nyambungka dua endur iya nya ari bekau Kuari Ang Cheng Ho ke
Emart Batu Kawa ti pemesai semua tanah urung 60 ekar,” terang iya.
Ngenang silik, Dr Sim ti mega Kaban Kunsil Nengeri (ADUN) Batu Kawa madahka, projek nya mega nyengkaum ngaga taman tema ai sereta mayuh kereban rekreasyen ke bukai baka alai belanda, ngena basikal, niki dinding enggau mayuh agi.
Nitihka iya, semua langgur nya deka dipejalaika berenggat laban naka ke diatu agi dalam renggat keterubah.
“Renggat tu nyengkaum ngaga balai mayuh guna, hab inovesyen TEGAS enggau sekeda kereban bukai ti enggau semua ungkus belanja RM20 juta ba kandang endur bekau Kuari Ang Cheng Ho,” terang iya.
Ungkup renggat kedua enggau ketiga ku iya, nya deka nyengkaum langgur ngaga palan meli barang, hotel, kereban lumba enggau main ai, lumba ekstrim sereta kereban rekreasyen.
“Enti semua projek tu tembu ila, temuai enggau mensia mayuh kelebih agi maya ujung minggu ulih datai ngagai kandang endur Batu Kawa ngena kereban nya.
“Taja pia, enda dikeenggai pemansang tu deka ngujungka penanggul besekut ba jalai raya nyadi. Nya alai, Premier Datuk Patinggi Tan Sri Abang Johari Tun Openg udah ngemendarka pengawa ngagai jalai baru enggau jematan kedua ti nyambungka Batu Kawa nyentuk ke Moyan, kelimpah ari Jalai Stephen Yong ke Kampung Segedup,” ku iya.