Rayat ke tusah enda ngira bansa, jalai pengarap patut dibantu: Chiew
Tiap iku rayat enda ngira latar belakang bansa enggau jalai pengarap endang patut nerima bantu nyema sida betapi penusah.
Kaban Parlimen Miri, Chiew Choon Man arap bendar ngena chara ngemeranka ulah nya ulih nempa siti komuniti MADANI tauka Malaysia MADANI inklusif ti mungkur semua.
“Nyadi prinsip aku nyadi Kaban Parlimen ditu iya nya aku benung ngaga rambai jaku ‘Di mana ada kesusahan, di situ ada keadilan.’
“Tu semengat ti deka ditempa enggau semua orang. Enda ngira sapa, asal aja orang nya begunaka bantu maya tusah, kitai patut nguji mantu sida,” ku iya.
Nitihka Chiew, pemansang ti dilanggur ukai semina patut difokus tauka diasaika seraban aja.
Pengaya ti dikeempu menua ku iya, patut diagih sebela ngagai tiap rayat ke mega endang tuju kuing perintah MADANI diatu.
Ku Chiew, taun tu mega iya deka terus negika mayuh agi projek beguna di Miri.
Chiew mega deka ke pengawa ngemanahka agi Padang Bilun Miri enggau Kompleks Imigresen, Kastam dan Keselamatan (ICQS) jampat digaga.
“Aku minta perintah mantu kitai mutarka penanggul tu,” ku iya bejaku ba pengerami Nerima Pengabang Taun Baru China diatur Pusat Khidmat Rakyat Parlimen Miri ditu, Hari Lima.
Chiew madahka, iya bisi mantaika penanggul bah ba kandang endur palan pendiau baru Tudan Desaras di Parlimen sereta minta bantu ungkup belanja ari perintah besai dikena ngemanahka agi parit.
Iya madahka, penanggul bah nya chukup ngenusah peranak ba kandang endur nya tiap kali musim pengujan.
“Maya kitai nyadi perintah, endang nyadi tangunggpengawa nentuka kandang endur nya bisi peluang dikemansang. Dalam timpuh ti sama tentuka pengelantang pendiau rayat dijaga,” terang iya.
Ngenang pengerami nya, Chiew madahka pengerami nya diintu semua bansa ti lalu nyadi penyelai ti ngayanka penyerakup bansa dalam siti ruang bilik.
Pusat Khidmat iya ku Chiew deka terus ngatur pengawa nerima pengabang maya bisi pengerami besai ti ulih meri peluang berandau sereta betemu enggau pemesai parti.
Sama bisi datai Chairman Majlis Pimpinan Negeri (MPN) PKR Sarawak Roland Engan enggau Kaban Dewan Negara ti mega Timbalan Pengerusi MPN Senator Abun Sui Anyit.