Aplikasyen ‘KETEK’ ti keterubah bisi pilih Jaku Iban dalam bejalaika servis
KUCHING: Leka jaku ‘Ketek’ ti udah nyadi tebilang laban Premier Sarawak Datuk Patinggi Tan Sri Abang Johari Tun Openg kenyau ari taun 2022, diatu udah nyadi sebuah aplikasyen ke deka meri pemaik ngagai komuniti, di nengeri tu.
Ti manah agi, pemansang aplikasyen tu iya nya ti keterubah nyendiaka pilih dalam Jaku Iban, kelimpah ari Jaku Melayu, China enggau Inggeris.
Aplikasyen ti nyendiaka servis dalam sektor nganjung barang tu iya nya 100 peratus dipenggi bumiputera Sarawak empu.
Ketuai Pemesai Eksekutif (CEO) KETEK Suhardy Yakop madahka, leka jaku ‘Ketek’ tu diambi ari Jaku Sarawak ke suah disebut Abang Johari.
Nitih ku iya, KETEK iya nya siti ari aplikasyen ti ditempa dalam ngangkatka ekonomi digital kelimpah mantu bala pedagang nambahka penatai pemisi lalu nyendiaka peluang gawa ngagai anak Sarawak.
“Kami setuju deka ngaga
sebuah aplikasyen pengudah kami meda peminta dalam servis nganjung barang tu majak nambah ke diatu.
“Beserimbai enggau tu, penguna aplikasyen tu ulih berengkah ngena nya sehari tu (ensana) di selampur Sarawak,” ku iya maya pengerami pra bejadi aplikasyen Sarawak KETEK di Hotel Riverside, ditu kilah ensana.
Suhardy madahka, raban sida ngambi timpuh pengelama enam bulan dalam ngemansangka aplikasyen tu.
“KETEK mega deka bejalaika pengawa begulai enggau aplikasyen nganjung barang ke dikemansang di Indonesia iya nya KETIK.
“Juluk kami iya nya nyadi raban penganjung barang garis entara menua SarawakIndonesia,” ku iya seraya ti
nambah tu mega nengah dua chara nganjung iya nya halal (beg mirah) enggau enda halal (beg biru).
Suhardy nambah, aplikasyen tu bisi bida enggau aplikasyen nganjung barang ke bukai laban tu enda ngambi sebarang komisyen ari orang ti nganjung (rider)
enggau penyual (vendor).
“100 peratus penatai pemisi diterima ari vendor enggau penganjung iya nya diempu sida. Kelimpah ari tu, rega barang ke dalam aplikasyen tu mega iya nya sama enggau dijual ba kedai,” ku iya nambah.
Beserimbai enggau tu, COFounder
KETEK, Qadafi Johari madah, peminta raban komuniti ngagai aplikasyen tu endang chukup ngelantangka ati kelebih agi ari anak Sarawak tu empu ti bejalaika pengawa, naka ke diatu.
“Ba renggat tumu, kitai deka berengkah nyendiaka servis ari Kuching ke Lawas nyengkaum mungkur kandang menua pesisir, genturung pendiau ke sebedau tu enda kala nerima bungkur servis nganjung barang,” ku iya nerang.
Beserimbai enggau tu, Menijer Operasyen, Dagang enggau Korporat Khusairi Johari madahka, aplikasyen KETEK tu bisi empat bansa jaku dikena iya nya Inggeris, jaku Malaysia, Iban enggau China.
“KETEK iya nya aplikasyen ti keterubah di dunya tu nyendiaka servis enggau Jaku Iban.
“Kelimpah ari nganjung pemakai enggau ai irup, aplikasyen tu mega bisi nganjung barang baka gari, kereban dapur, farmasi, gis petroleu cecair enggau mega parcel,” ku iya.
Berindik ari tu, Khusairi ngarapka rayat di nengeri tu meri sukung ngagai aplikasyen ti manahka penguna ungkup pemaik ekonomi Sarawak.
Aplikasyen KETEK ulih digiga dalam ‘Play Store tauka berejista terus ke ulih digaga ba aplikasyen tu.