Sarawak nyadi chuan dalam pengawa ngatur polisi ekonomi gadung
Bala duta Amerika Latin ngembuan pengingin deka ngaga kaul kerejasama dalam polisi energi gadung ti ulih nyadi pekara dagang
KUCHING: Bala duta ari menua Amerika Latin madahka pengerindu ati dalam belajarka pengawa ngatur polisi ekonomi gadung ke dipejalaika perintah Sarawak.
Premier Sarawak Datuk Patinggi Tan Sri Abang Johari Tun Openg madah, semua sida deka ngelawa nengeri tu kena minggu ti deka datai.
Sida deka nemu enggau belajarka chara kitai ngatur ekonomi nengah energi gadung.
Datuk Patinggi Tan Sri Abang Johari Tun Openg
“Minggu nyin ila, semua duta Amerika Latin di Kuala Lumpur ke deka datai. Taja pan jauh, sida endang deka datai kitu.
“Sida deka nemu enggau belajarka chara kitai ngatur ekonomi nengah energi gadung,” ku iya.
Iya madah munyi tu lebuh ti bejaku maya pengerami Makai Lemai Taun Baru China 2024 enggau Pengerami 45 Taun Persekutuan Persatuan China Bahagian Kuching, Samarahan enggau Serian di Palan Konvensyen Borneo Kuching (BCCK) ditu, kena malam Hari Minggu nyin tadi.
Sama datai, bini Premier Sarawak Datuk Amar Juma’ani Tun Tuanku Bujang, Sapit Premier Sarawak
Datuk Amar Dr Sim Kui Hian, Menteri Industri Pemakai, Komoditi enggau Pemansang Kandang Menua Dato Sri Dr Stephen Rundi Utom, Sekretari Perintah Sarawak Datuk Amar Mohamad Abu Bakar Marzuki enggau Presiden Persekutuan Persatuan China Bahagian Kuching, Samarahan enggau Serian Datuk Richard Wee.
Besrimbaienggautu,Abang Johari ngelalau komuniti dagang ngambika nelebaka diri enggau nama ti diguna dunya.
“Komuniti dagang menua tu patut nelebaka diri lalu madahka kebendar iya nya energi gadung tu beguna.
“Lapa? (Laban tu) intitusyen pekara wang di selampur
dunya dekaka kitai ngasika atur Alam Sekitar, Sosial dan Tadbir Urus (ESG),” ku iya nerang.
Dagang nengeri tu ku iya enda ulih nitihka chara lama lalu ari nya, patut bisi ubah bekaul enggau chara bejalaika ekonomi kitai.
“Keterubah, pun kayu enda tau ditebang agi laban kitai deka lenyau rega kayu kampungtu. Tu patut ditukar nyadi pemisi ungkup dagang karbon laban dunya diatu ngasaika ubah dalam gaya mua hari,” ku iya.
Berindik ari tu, ku Abang Johari, Sarawak ngiga chara mutarka dalam ngurangka pekara ngelepaska rumah gadung kelebih agi karbon dioksida.
“Bulan nyin kemari kitai ngembuan semua duta ari menua Eropah ti bisi 19 iku sereta ketuai korporat sida datai ke Sarawak. Lapa (datai kitu)? Sida nemu jemah ila Sarawak ke alai kitai tu kaya enggau pemisi ti ulih ngurangka pengawa ngemansutka karbon,” ku iya.
Iya nambah, tu iya nya keterubah duta Kesatuan Eropah ngembuan pengingin deka ngaga kaul kerejasama enggau Sarawak.
“Patut nya sida ke palan bukai, tang datai kitu laban sida deka nemu tunga kuing ekonomi kitai lalu sida ngenukuka Strategi Pemansang Pengudah COVID-19 2030 (PCDS 2030) Sarawak,” ku iya.