Perintah Sarawak setuju Universiti Fudan di Shanghai muka pampang kampus ditu
Perintah Sarawak setuju enggau perambu Persekutuan Persatuan Cina Bahagian Kuching, Samarahan enggau Serian dalam mai Universiti Fudan di SHanghai numbuhka kampus pampang sida di nengeri tu.
Premier Sarawak Datuk Patinggi Tan Sri Abang Johari Tun Openg madah, pengawa numbuhka universiti ari China tu deka meri pengelebih ungkup milih palan belajar ungkup anak Sarawak nampung pelajar ke renggat ti tinggi agi.
“Aku setuju nyema bisi kampus ari China (di Sarawak). Kitai benung meda peluang dalam ngaga kaul kerejasama enggau Universiti Fudan lalu diatu, Sapit Premier Sarawak Datuk Amar Dr Sim Kui Hian benung ngatur pengawa berandau enggau raban ari China.
“Nyema sida besetuju, udah tentu bala anak kitai bisi peluang nampung pelajar di universiti tu ba ditu, ke alai baka ditemu sida tu iya nya universiti lima ti pemadu tebilang di China,” ku iya ma pengerami Makai Lemai Taun Baru China 2024 enggau Ngintu 45 Taun Persekutuan Persatuan Cina Bahagian Kuching, Samarahan enggau Serian ditu, kena malam Hari Minggu.
Abang Johari ngarapka pemutus begulai tu ulih dijapai kededua perintah, Malaysia enggau China dalam numbuhka pampang universiti tu di Sarawak.
Beserimbai enggau tu, iya madahka pengawa nyuaka geran tanah ungkup pemesai lima ikar enggau dana sepenyampau RM15 juta ungkup pengawa ngaga sekula baru ke Sekula Sekondari Chung Hua No 4.
Kelimpah ari tu, ku iya,
perintah Sarawak mega udah mutuska deka meri agih belanja sepenyampau RM5 juta enggau tanah pemesai tiga ikar ngagai Lembaga Amanah Amal Cina Sarawak.
“Kitai dipadahka raban pengatur Sekula Sekondari Chung Hua No 4 deka ngerembaika sekula di Jalai Haji Taha tu laban penyampau nembiak dia majak nambah.
“Taja pia dini enggau bakani deka ngerembaika tu berindik ari palan ti enda besai ba taba ke diatu.
“Nya alai dalam nyendiaka pelajar ke manah ngagai bala anak kitai, perintah udah mutus ngagihka lima ikar tanah enggau RM15 juta dalam ngemansangka sekula baru tu. Ungkup lemabaga amanah, kitai meri tiga ikar tanah enggau RM5 juta. Malam tu ‘ang pow’ semua nya bisi RM20 juta laban kitai bisi penatai pemisi Sarawak ti lebih mimit, nya alai kitai deka bekunsi enggau komuniti China,” ku Abang Johari.
Dulu ari tu, Persekutuan Persatuan Cina Bahagian Kuching, Samarahan enggau Serian Datuk Richard Wee minta perintah Sarawak ngambika terus ngatur pengawa
berandau enggau raban universiti tebilang ari China ngambika muka kampus pampang sida di nengeri tu.
Ku iya, chara tu deka ngangkatka agi tikas pelajar tinggi di Sarawak ke udah mega ngambuan pampang Universiti Curtin enggau Swinburne ari Australia.
Iya mega, madahka sukung Persekutuan ngagai polisi perintah Sarawak dalam nyendiaka pelajar ti enda bebayar ungkup nembiak Sarawak di universiti ke dipenggi perintah tu berengkah taun 2026.
“Tu deka nyadi sebagi ari chara ti manah laban mayuh agi bala anak Sarawak deka bisi peluang ngulihka pelajar tinggi lalu ngurangka tating belanja apai indai sida,” ku iya.
Wee mega meri kenang basa ngagai perintah Sarawak laban ti udah ngagihka geran ninting taun ungkup pelajar China sepenyampau RM72 juta kenyau ari taun 2014.
“Pia mega perintah Sarawak udah merika kitai (Persekutuan Persatuan Cina Bahagian Kuching, Samarahan enggau Serian) tanah ti endang besai dalam pemansang ungkup nyungkak dana ngagai sekula ba jaku China,” ku iya nambah.