BETC diatur nangkup peminta global mutarka isu ubah gaya mua hari
KUCHING: Aum Peralihan Tenaga Borneo (BETC) benung dipejalaika pengelama dua hari berengkah 26 nyentuk 27 Februari ditu ke diatur SEDC Energy enggau Malaysian Rating Corporation Berhad (MARC).
Pengawa ngatur aum tu iya nya dalam nangkup peminta global dikean mutarka isu ubah gaya mua hari enggau ubah ngagai pemisi energi ti meruan.
Ketuai Pemesai Eksekutif SEDC Energy, Robert Hardin dalam jaku pengelalu iya madahka BETC 2024 iya nya kelai tanda tanya ti nyadi ngelingi sektor energi baru.
Beserimbai enggau tu, iya beterima kasih ngagai MARC laban pengawa ngatur begulai enggau BETC enggau mega raban ti meri sukung belanja dalam ngemujurka aum ti endang beguna tu.
Beserimbai enggau tu, Ketuai Pemesai Eksekutif Raban MARC, Datuk Jamaludin Nasir madahka Malaysia tu ba rintai mua dalam pengawa global dalam betukar ngagai guna energi.
Ku iya Pelin Tunga Kuing Ubah Energi Menua enggau Polisi Energi Menua udah ngeletakka pemun dalam pejalai puang beresi Malaysia enggau hidrogen bejalaika tanggungpengawa ti beguna dalam ‘penyahkarbonan’.
“Tu iya nya beguna ungkup kededua sektor peribit enggau perintah dalam ngambi bagi enggu aktif senentang betukar energi tu lalu kerejasama dalam mutarka isu enggau pemar nyadi sebuah menua ti tagap.
“Raban ti ngembuan pemerat sektor energi patut ngemeratka pengawa beranakka puku energi ti ulih dikemaru enggau ngemansutka hidrogen ti beresi agi, lalu institusyen pekara wang mesti bisi inovasyen enggau meransang pengawa beranakka
puku gadung,” ku iya.
Berindik ari tu, ku Premier Datuk Patinggi Tan Sri abang johari tun Openg datai meri jaku pengelalu ke mega bejadika BETC 2024 ti diatur ba Hotel Riverside Majestic ditu.
Aum tu mega bisi diatur enggau pengawa betukar dokumen ari SEDC Energy nyengkaum kerejasama strategik enggau Gentari Sdn Bhd Hab Hidrogen Sarawak.
Pengawa betukar dokumen kedua iya nya ngaul Sempekat Pemansang Begulai
(JDA) entara SEDC Energy enggau Samsung Kejuruteraan, Lotte Chemical enggau Korea National Corporation (KNOC).
Pia mega pengawa betukar dokumen ketiga iya nya entara SEDC Energy enggau Sarawak Metro ungkup Loji Hidrogen Rembus.
Semua ketiga inisiatif tu iya nya enggau tuju nyungkak teknologi hidrogen, ngemansangka pengawa mutarka energi meruan lalu nyungkak ‘penyahkarbonan’ di rantau tu.