PBSMM Sibu nerima AED, kereban latih ari LDS
SIBU: Gerempung Bulan Sabit Merah Malaysia (PBSMM) Pampang sibu udah nerima pemeri iya nya AED enggau kereban latih saup ngenyit ari The Malaysian Church of Jesus Christ of Latter-Day Saints (LDS), kena Hari Minggu.
Bansa barang ke diterima iya nya Automated External Defibrillator (AED), Latih Automated External Defibrillator (AED), ‘patung dewasa’, ‘patung bayi’, Beg Automated External Defibrillator (AED), pemanchit Automated External Defibrillator (AED), Beg PVC Ambu Resuscitator Dewasa + Tiub Oksigen + Kit, Beg PVC Ambu Resuscitator Bayi + Tiub Oksigen + Kit, Kit Pertolongan Cemas CPR, Topeng Poket enggau Beg Penyelamat AED.
Pemeri tu iya nya enggau tuju ngenegapka pengawa meri bantu ngenyit PBSMM Pampang Sibu sereta ngangkatka pengelikun komuniti Sibu.
Pemeri tu udah disuaka Elder Sandy Hall ari LDS ngagai Chairman PBSMM Pampang Sibu Penghulu Chua Hiong Kee lalu dikemataka Penyanding penemu
PBSMM Pampang Sibu Temenggong Dato Vincent Lau Lee Ming ba Indu Opis PBSMM Sibu ditu.
Nitih ku Chua, pemeri tu kelai sebagi ari pengawa ti berat ngagai komitmen sida dalam nentuka pengelikun enggau pengelantang kaban komuniti di Sibu.
“AED, kereban nyelamatka nyawa ti begun, ditambah enggau Kereban Latih Bantu Ngenyit, deka bejalaika tanggungpengawa ti berat dalam ngelengkapka komuniti kitai enggau pengelandik sereta pemisi ke diguna dalam meri timbal enggau beguna ngagai pengawa bantu ngenyit sereta penusah ngenyit.
“Pemeri tu ukai semina ngenegapka pengulih kami dalam mekuh ngagai bantu lengkas maya penusah ngenyit tang mega ngenegapka individu dalam komuniti kami ungkup nyadi proaktif mutarka krisis pengerai,” ku iya nengah siti penerang.
Ku iya madah, AED iya nya kereban ulih dibai mindah kin kitu ke ulih dikena nyelamatka nyawa ngagai individu ti kena serang penyakit tungkul ati ti enda disadang, lalu nyata tu ulih ngengapka peluang sida terus idup.
Kelimpah ari tu, ku iya nerang, Kereban Latih Bantu Ngenyit deka nentuka sida bejalaika sesi latih ti komprehensif, nyikap pesereta enggau penemu sereta pengelandik ti beguna dalam pengawa ngatur penusah ngenyit.
Iya mega madahka, PBSMM Pampang sibu komited dlaam ngajar pengelandik nyelamatka nyawa baka CPR enggau bantu lengkas pemun nengah mayuh macham program latih enggau woksyop.
Inisiatif tu, ku iya nambah, setipak enggau program latih ari Dana Pembangunan Sumber Manusia (HRDF) ti nyukung peminta kus tu.
Ke penerang ti silik bekaul enggau kus nyelamatka nyawa tu, PBSMM Pampang sibu meransang mensia mayuh ngambika betelefon ngagai sida ba lumur 084337066 tauka 016-3047066 (WhatsApp) maya jam orang gawa.
Besermbai enggau tu, PBSMM Pampang sibu meri besai terima kasih ngagai LDS ba komitmen sida ngangkatka pekara pengerai enggau pengelikun komuniti.