Sarawak mantaika agenda ekonomi digital ba MWC24
Nengah Ruai Sarawak lalu dikena ngulihka peluang beranakka puku ti setipak enggau agenda digital Sarawak
KUCHING: Sarawak mantaika agenda ekonomi digita maya Kongres Dunia Mudah Alih 2024 (MWC24) ti benung dipejalaika di Barcelona, Sepanyol enggau muka palan pemandang ti dikumbai Ruai Sarawak.
Menteri Utiliti enggau Telekomunikasyen Dato Sri Julaihi Narawi ti ngemuna Ruai Sarawak kilah ensana, madahka tu iya nya nyadika pelasar dalam ngelakuka peluang beranakka puku ti setipak enggau agenda digital Sarawak.
“Ruai Sarawak ngayanka inisiatif ekonomi digital ti dirintai dalam Pelin Bejalaika Pengawa Ekonomi Digital Sarawak 2030 ti mekuh ngagai komitmen perintah dalam nyungkak inovasyen enggau nerenakka penumbuh dalam landskap digital,” ku iya nengah penerang berita pengudah ngemunka Ruai Sarawak.
Julaihi ti nyadi ketuai deligit Sarawak ke MWC2, madahka enggau mekuh ngagai inisiatif digital sereta mutarka pekara enggau meruan, Sarawak ngembuan juluk ngengkahka diri dalam pengemeran besai ba ekosistem teknologi mobil di Malaysia enggau mega global.
“Kami chukup andal ati dalam ngambi bagi ba Kongres Dunya Mobil Barcelona 2024, pelasar ti ngempuruka penempa baru, ketuai ti ngembuan runding dalam sereta pakar industri ari selampur dunya.
“Penatai Sarawak di MWC tu ngemeratka komitmen kami nyungkak inovasyen enggau ngena memanah teknologi dalam mutarka pemar sereta peluang era digital. Tu mega beguna, pelin enggau inisiatif pemansang Sarawak ulih dipeda ba renggat global,” ku iya.
MWC di Barcelona iya nya program ti pemadu besai sereta ti pemadu dikemerat dalam sektor penyambung enggau komunikasyen mobil.
Profesional enggau pengemeran industri ari mayuh bidang ti bekaul enggau penyambung, inovasyen digital sereta teknologi datai ngulu aum ninting taun ti ngayanka teknologi ti pemadu baru dalam sektor telekomunikasyen.
“Taun tu, deligit Sarawak mekuh dalam neresa pengawa pemutar alternatif enggau strategi entara bungkur internet dalam meransang peemansang ekosistem digital telek enggau telekomunikasyen dalam MWC24.
“Nengah nguihka penerang bekaul enggau teknologi sereta inovasyen ti
pemadu baru enggau ngaul diri enggau pengempu industri, deligit mekuh deka ngerapitka kaul kerejasama ti deka ngangkatka transformasyen digital enggau nyata di Sarawak, setipak enggau siti ari penentu ngagai pemansang ekonomi,” ku Julaihi.
Semanjai timpuh MWC24,
iya madahka deligit deka aktif dalam mayuh macham program ngelawa teknikal seraya ti belajar.
Julaihi madahka pengawa tu iya nya dikena nemu enggau neresa peluang enggau teknologi ti pemadu baru ti kondusif ngagai aspirasyen pemansang Sarawak.
Entara pengari Sarawak ke diatai ba MWC24 iya nya Sapit Menteri opis menteri tu iya nya Datuk Liwan Lagang, Datuk Len Talif Salleh enggau Datuk Abdullah Saidol.
Raban deligit mega ti sama bisi iya nya Sekretari Pekara Wang Nengeri Dato Sri Dr Wan Lizozman Wan Omar, Sekretari Mendam Opis Menteri Utiliti enggau Telekomunikasyen Jafri Lias, Menijer Besai Autoriti Multimedia Sarawak (SMA) Dato Osman, Direktor Unit Pekara Digital Servis Perintah Sarawak Grace Huong Siew Hung enggau pemesai ari Opis Menteri Pengerai Mensia Mayuh, Pengawa Berumah enggau Kaunsil Kandang Menua, Unit Perambu Ekonomi, Sistem Penerang Sarawak, Sarawak Energy Berhad enggau Tabung Ekonomi Gagasan Anak Sarawak.
Ku Julaihi nambah, deligit ti besai tu mekuh ngagai komitmen Sarawak dalam ngemeranka kerejasama enggau ngambi peluang pakar global ungkup pemansang sektor digital enggau telekomunikasyen.
Ruai Sarawak ngayanka inisiatif ekonomi digital ti dirintai dalam Pelin Bejalaika Pengawa Ekonomi Digital Sarawak 2030 ti mekuh ngagai komitmen perintah dalam nyungkak inovasyen enggau nerenakka penumbuh dalam landskap digital.