Kunteriktor patut ngena peluang mua hari ti manah ngelengkaska projek
Sapit Premier Sarawak Datuk Amar Douglas Uggah Embas dekaka kunteriktor projek infrastruktur baka jematan di selampur nengeri tu ngena peluang tu ari gaya mua hari ti manah ke diatu.
Iya madahka sida (kunteriktor) ambika chunto patut nentuka pengawa sida bekali lipat dalam nentuka pejalai projek infrastruktur ulih tembu nitihka timpuh tauka enda betangguh.
Uggah ti mega Menteri Infrastruktur enggau Pemansang Palan Penyangkai Kapal madahka diatu perintah udah ngemendarka mayuh projek jalai di selampur nengeri enggau dalam proses bejalaika pengawa.
“Opis Kereja Raya (JKR) nengeri udah bebendar enggau pengawa sida bejalaika projek.
“Di pelilih menua Marudi aja, kitai bisi urung 10 projek jalai. Taja pia, kebendar nya, di bagi menua Miri, bisi dua ejensi ti bekaul dalam pengawa ngaga jalai iya nya JKR enggau RECORDA,” ku iya.
Iya madah munyi tu ngagai pengarang berita lebuh ti ngatur program ngelawa ke taba projek Jematan Marudi, kemari dalam nentuka tikas pejalai projek ti pemadu baru.
Sama bisi iya nya Sapit Menteri Pengerai Mensia Mayuh, Pengawa Berumah enggau Kaunsil Kandang Menua Datu Dr Penguang Manggil ti mega Kaban Kunsil Nengeri (ADUN) Mardui enggau Sekretari Mendam Opis Menteri Infrastruktur enggau Pemansang Palan Penyangkai Kapal (MIPD) Datuk Chiew Chee Yau.
Lebuh ti madah enggau silik, Uggah madahka RECORDA tu mekuh ngagai pengawa ngaga jalai alun dalam kandang menua Ejensi Pemansang tanah Tinggi (HDA) lalu tanggungpengawa JKR bisi kurang taja pia deka terus matau enggau
rat semua tikas pejalai projek.
Bekaul enggau projek jematan Marudi tu, Uggah madah, iya endang chukup temegah ati enggau tikas pemansang projek tu.
“Diatu udah tembu 68.4 peratus dibandingka enggau dalam perambu 56.33 peratus ti dalam timpuh dua taun pengawa naga tu.
“Tu dipelabaka tembu kena bulan September taun tu dibandingka enggau timpuh perambu asal iya nya datai ba taun 2025 (dua setengah taun),” ku iya nerang.
Iya mega madahka Premier Sarawak Datuk Patinggi Tan
Sri Abang Johari Tun Openg lebuh ti ngatur program ngelawa ke Marudi taun nyin kemari udah minta ngambika kunteriktor megai tanggungpengawa nembuka jematan Marudi dalam timpuh dua taun.
“Ari nama ti ulih dipeda kitai sehari tu, kunteriktor bejalaika pengawa sida enggau manah sekali baka ti dipinta.
“Sida ngembuan injin enggau barang nyengkaum fabrikasyen di taba. Dikena mutarka penanggul kurang pengereja pengawa sida udah nentuka pengereja pengawa bekereja maya malam hari enggau bayar pampas ti engkeman.
“Tu mih chara sida bekereja dalam nyapai tikas peratus tembu ti endang ngemegahka,” ku iya.
Pekerjaan Piasau Konkerit Senderian Berhad benung nembuka laluh pengawa projek jematan Marudi enggau penyampau kunterik iya nya RM116.5 juta.
Jematan semanjai 650 meter enggau dua jalai tu dipelabaka tembu datai ba bulan Julai taun tu.
Nitih ku Uggah nambah, inisiatif kunteriktor jematan Marudi tu patut nyadika chunto ngagai kunteriktor jematan ke bukai.