Perintah Sarawak nyuaka RM1,628,600 ungkup 43 gerempung nembiak, lumba enggau main
Perintah nengeri udah nyuaka geran sepenyampau RM1,628,600 ngagai 43 buah gerempung belia enggau lumba enggau main dalam ngenegap enggau nyukung sida dalam aktiviti enggau program ninting taun, seraya nyikap diri ungkup Lumba enggau Main Malaysia (SUKMA) Sarawak XXI 2024.
Menteri Nembiak, Lumba enggau Main enggau Pemansang Orang Dagang Dato Sri Abdul Karim Rahman Hamzah madah, perintah ngenukuka tanggungpengawa ti berat gerempung nembiak, lumba enggau main nyadika penyungkakagendapemansang komuniti nengeri nengah Inklusiviti Rama ba baruh Strategi Pemansang Pengudah COVID-19 (PCDS) 2030.
Beserimbai enggau tu, iya ngarapka pengaawa meri geran tu ulih ngenyakahka kaul enggau penyereta komuniti dalam program enggau mega aktiviti gerempung nembiak, lumba enggau main di Sarawak.
“Ngarapka geran ti diberi tu ulih ngangkatka pengeransing ngagai semua gerempung nembiak, lumba enggau main menua tu ngambika terus mansang dalam nyapai visyen, enggau misyen sereta juluk penumbuh gerempung sida ti mungkur semua,” ku iya.
Iya madah munyi tu lebuh ti bejaku maya bejadi Pengerami Nyuaka Geran Lumba enggau main enggau Nembiak Sarawak 2024 ti diatur Opis Menteri Nembiak, Lumba enggau Main enggau Pemansang Orang Dagang Sarawak (MYSED) di sebuah hotel ditu kena malam Hari Satu.
Abdul Karim minta tetiap gerempung enggau atlit ngambika nerenakka runding nyadi champion lalu nyapai juluk sida.
Iya mega ngelalau semua gerempung nembiak sereta kelab lumba enggau main di Sarawak ngambika enda bemain politik tuka bechiping dalam aktiviti ngatur pekara bekaul enggau atlit.
“Nyema gaya nya bisi nyadi, tu deka ngeruga tikas pemanah rikod nyengkaum pengawa atlit menua tu ba SUKMA ila,” ku iya.
Bejaku silik bekaul enggau SUKMA, Abdul Karim madahka semua tu, pengawa nyikap diri Sarawak ngatur program lumba enggau main tu iya nya benung dipejalaika enggau manah.
Pia mega diatu, ku iya, semina tinggal 174 hari aja agi sebedau datai ba SUKMA Sarawak.
Berindik ari tu, iya ngelalau ngambika gerempung nembiak, lumba enggau main di Sarawak begulai lalu bebendar nyadika Sarawak tu champion ungkup Sukma XXI.
“Enggau agih belanja, peluang ti bisi tu, aku minta ngagai semua gerempung, gerempung nembiak, lumba enggau main ti datai malam tu ngambika terus ngangkatka potensial enggau tikas pemanah rikod sida setipak enggau batang tuju penumbuh gerempung kita.
“Aku mega ngarapka enggau sukung ti rat ari perintah Sarawak, kitai ulih angkat nyadi kuasa lumba enggau main di Malaysia lalu sedia napi SUKMA dalam taun tu,” ku iya.