Wan Junaidi udah nerima pingat ‘Darjah Utama Yang Amat Mulia Satria Bintang Sarawak’
Ti mai gelar Pehin Sri kenyau ari ti dichiri nyadi Yang di-Pertua Negeri Sarawak kena 29 Januari 2024
KUCHING: Yang di-Pertua Negeri ke baru Tun Dr Wan Junaidi Tuanku Jaafar kemari udah nerima gelar ti pemadu tinggi nengeri ‘Darjah Utama Yang Amat Mulia Satria Bintang Sarawak’ (SBS) ti mai gelar Pehin Sri.
Maya pengerami meri gelar tu dipejalaika di Asatana Negeri, Premier Sarawak Datuk Patinggi Tan Sri Abang Johari Tun Openg ngarika perintah nengeri nyuaka gelar tu ngagai Wan Junaidi ke udah dichiri nyadi Yang di-Pertua Negeri kelapan kena 29 Januari 2024.
Sapit Premier Sarawak Datuk Amar Awang Tengah Ali Hasan ti meri jaku pengelalu maya pengerami tu madahka, Wan Jinaudia ngembuan pengawa ti tebilang ngayanka iya endang komited dalam servis perintah, skularship enggau kaul begulai enggau komuniti.
“Enggau pengawa ti udah ngelui berapa dekad meri servis ti komited ngagai menua enggau komuniti antarabansa, Wan Junaidi ti nyadi ketuai tu endang meri komitmen ke dalam ngagai penyulut, integriti enggau pemansang komuniti,” ku Awang tengah.
Wan Juanidi tu ada kena 1 Februari 1946 di Sadong Jaya, Simunjan ngembuan Ijazah Kedoktoran ba Pentadbiran Perniagaan (DBA) ari University of Southern California, Ijazah Barrister Utter ari Council of Legal Education London enggau
Ijazah Sarjana Muda Undangundang ari University of Buckingham, England.
Sebedau nyadi Yang diPertua Negeri, Wan Junaidi udah meri servis dalam mayuh kapasiti dalam pangku pengawa perintah nyengkaum Yang Dipertuan Negara, Menteri Di Jabatan Perdana Menteri (Parlimen dan Undang-Undang), Menteri Pemansang Orang Dagang enggau Koperasi, Menteri Rampa Menua enggau Pengeraja Asal, Sapit Menteri Dalam Menua enggau
Sapit Speaker Dewan Rakyat.
Awang Tengah madahka lebuh megai pangku pengawa menteri mayuh bantu udah diberika Wan Junaidi.
Entara nya lebuh nyadi Menteri ba Opis Menteri Besai (Parlimen enggau Undang-Undang) Wan Junaidi udah nyadi ketuai dalam pengawa ngubah Konstitusyen Perintah Besai ngambi namaka Undang-undang Anti Lompat Parti, ngemanahka proses ngerejister pengundi ungkup rayat ti beumur 18
taun lalu negika Sempekat Malaysia 1963 (MA63).
Kelimpah ari tu, maya nyadi Menteri Pemansang Orang Dagang enggau Koperasi Wan Junaidi udah ngepunka inisiatif baka numbuhka Universiti Orang Dagang Koperasi Malaysia lalu ngemanahka proses nyali PKS (Dagang Mit enggau Tengan Pemesai).
“Pengudah nya, lebuh iya nyadi Menteri Rampa Menua enggau Pengeraja Asal, Tun Wan Junidi udah megai tanggungpengawa besai dalam
pengawa berandu bekaul rampa menua antarabansa baka Sempekat Paris 2015 enggau tunga kuing ‘Sempekat ASEAN Nadai Sebun Asap 2020’,” ku iya.
Dalam pejalai politik iya, Wan Junidi kala nyadi Kaban Parlimen Batang Lupar ari taun 1990-1995 enggau Santubong ari taun 2004-2018.
Sukung iya ngagai mayuh komiti sereta gerempung, ngayanka iya ti komited dalam servis mensia mayuh sereta mega administrasyen.
“Lebuh iya terus meri servis nyadi Yang di-Pertua Negeri Sarawak bekau pengawa Wan Junidi deka meruan lalu nyadika peransang integriti, penyulut enggau penyiru dalam nyadi ketuai,” ku Awang Tengah nambah.
Sama bisi datai iya nya Sapit Premier Sarawak Datuk Amar Douglas Uggah Embas, Datuk Amar Dr Sim Kui Hian, Sekretari Perintah Nengeri Datuk Amar Mohamad Abu Bakar Marzuki enggau kaban kabinet Sarawak ke bukai.
“Enggau pengawa ti udah ngelui berapa dekad meri servis ti komited ngagai menua enggau komuniti antarabansa, Wan Junaidi ti nyadi ketuai tu endang meri komitmen ke dalam ngagai penyulut, integriti enggau pemansang ” komuniti. Datuk Amar Awang Tengah Ali Hasan