Perintah Sarawak udah besedia ngambi, ngempu Palan Penyangkai Kapal Bintulu
Perintah Sarawak udah besedia enggau bebendar ngambi sereta ngempu Penyangkai Kapal Bintulu ti dipelaba disuaka perintah besai ba bulan Jun tu.
Sekretari Perintah Sarawak, Datuk Amar Mohamad Abu Bakar Marzuki taja pia madahka, bisi sekeda pekara patut diputarka dulu sebedau nembuka semua proses ngambi sereta ngempu nya.
“Bisi sekeda pekara ti patut diatur dulu sebedau dibai ke Parlimen,” ku iya maya dirandau raban pengarang berita ba pengerami Apresiasi Media Pelabuhan Bintulu di sebuah hotel ditu, malam ensanus.
Abu Bakar ti mega Chairman Bintulu Port Holdings Berhad enggai ngenang silik lebuh ditanya bekaul enggau penerang silil pasal penerang pemadu baru atur nyuaka penyangkai kapal nya ngagai perintah Sarawak.
“Premier Sarawak Datuk Patinggi Tan Sri Abang Johari Tun Openg deka madah (pasal pekara nya).
“Sarawak udah besedia (ngambi sereta ngempu nya) enggau ti diambi sereta diempu perintah nengeri iya nya Lembaga Pelabuhan Bintulu, sereta Bintulu Port Holdings Berhad nyadi operator. Taga kitai (ngambi sereta ngempu) iya nya ba bulan Jun tu,” ku iya.
Bepelasarka ripot sebedau tu, perintah besai setuju meri Penyangkai Kapal Bintulu ngagai perintah Sarawak, berengkah Jun tu.
Pekara ti diputuska dalam aum Komiti Begulai Perintah Besai - Nengeri kena 8 Januari 2024 ti bechairmanka begulai Menteri Pengangkut Malaysia Anthony Loke enggau Sapit Premier Sarawak Datuk Amar Douglas Uggah Embas.
Kelimpah ari nya, Abang Johari lebuh bejaku ba pengerami nerima pengabang Taun Baru China 2024 Parti Demokratik Progresif (PDP) di Bintulu apin lama madahka pengawa ngambi enggau ngempu Penyangkai Kapal Bintulu nya nyungkakka industri kapal di nengeri tu seraya ngenyakahka agi pemansang ekonomi endur nya.
“Tu siri penyulut pemadu beguna ngagai perintah Sarawak laban muju ngambi pulai hak nengeri enggau penyangkai kapal dijaga penuh kitai ti ulih mantu ngenyakahka agi ekonomi di nengeri tu dalam sektor penyangkai kapal enggau kapal,” ku iya.
Nambah nya, iya madahka pemujur Sarawak ngambi pulai penyangkai kapal nya lalu ulih meri awak diurus nyadi penyangkai kapal ti nyadi hak penuh nengeri Sarawak.