Pusat Jantung Sarawak ulih nyadi 10 sepital kardiologi ti tebilang di Asia-Pasifik
Pusat Jantung Sarawak ulih nyadi entara 10 sepital kardiologi sechara spesifik pemadu manah di rantau Asia-Pasifik enti nengeri tu diberi mayuh agi duit enggau autonomi.
Sapit Premier Sarawak, Datuk Amar Dr Sim Kui Hian madahka, taun nyin kemari, Pusat Jantung Sarawak nitihka Newsweek, dalam 100 pemadu atas di rantau Asia-Pasifik.
“Beri kami awak, mayuh rayat Sarawak ulih ngereja nya.
“Enti perintah besai meri kitai duit ke chukup, kitai ulih nyapai ba tikas 10 pemadu atas,” ku iya bejaku ba pengerami Serumpu Makai Lemai nyerumba ngintu Genap Lapan (8) Taun Parti Rakyat Bersatu Sarawak (SUPP) Pampang Batu Kitang enggau Taun Baru China, malam ensanus.
Dr Sim, ti mega Menteri Pengerai Mensia Mayuh,
Pengawa Berumah enggau Perintah Lokal, nandu madahka Pusat Jantung Sarawak mega iya sebuah
sepital mensia mayuh ari Malaysia bisi dalam lis 100 pemadu atas.
“Kami (Pusat Jantung
Sarawak) ukai ti pemadu besai (di Malaysia). Kami ukai pemadu lama laban ke pemadu lama di Pulau Pinang (tang) sida enda dalam 100 pemadu atas.
“Nya alai, (tu ngayanka) kitai ulih ngereja iya. Beri kami awak, pulaika kuasa kami,” ku iya.
Iya madahka Pusat Jantung Sarawak udah nyendiaka perubat ngagai 245,000 iku orang dalam timpoh 22 taun ke udah.
Ngenang pekara bukai, Dr. Sim minta rayat Sarawak terus nyukung Premier Sarawak Datuk Patinggi Tan Sri Abang Johari Tun Openg iya nya polisi ti ukai semina polisi nyadika Sarawak nambahka asil tang mega nyadika nengeri tu lebih dipebasa enggau ditemegah.
Ngarika SUPP, iya beterima kasih ngagai penyukung ti nyukung sida ti ngujungka chalun SUPP menang ba pengawa bepilih nengeri sebedau tu sereta nyadi pengari rayat dalam perintah Gabungan Parti Sarawak (GPS).
Kelimpah ari nya, Kaban Kunsil Nengeri (ADUN) Batu Kitang ti mega Chairman SUPP Batu Kitang Dato Lo Khere Chiang madahka Sarawak benung nyapai pemansang ti tegap ari baruh iring pengelandik Abang Johari ke nyadi Premier Sarawak.
“Kitai patut bisi perintah ti pemadu tegap.
“Kami begunaka tiap rayat Sarawak beserakup ari baruh GPS sereta ngena siti penemu, minta hak enggau autonomi baka pengerai enggau pelajar dipulai ke Sarawak.
“Ditu, aku deka meri terima kasih ngagai Sapit Premier Sarawak Yang Berhormat Dr Sim laban ti chukup chakah tauka regas negika kelebih agi bekaul enggau kereban pengerai, lebih mayuh pusat jantung enggau ke pemadu beguna iya nya autonomi pengerai Sarawak ari perintah besai,” ku iya.