Palan Penyangkai Kapal Bintulu bebendar deka nangkup peminta energi gadung, beresi dunya
Palan Penyangkai Kapal Bintulu bisi pengingin deka nyadi penyangkai kapal energi gadung besai dikena napi peminta guna energi gadung enggau beresi dunya jemah ila.
Ketuai Pemesai Eksekutif Bintulu Port Holdings Berhad Ruslan Abdul Ghani madahka, nya setipak enggau timpai tauka visyen Premier Sarawak Datuk Patinggi Tan Sri Abang Johari Tun Openg deka ke Sarawak nyadi kuasa ekonomi nguluka Malaysia dalam energi gadung enggau beresi.
“Kami nemu kunchi dalam nyapai timpai nya, iya nya ngena chara ngembuan infrastruktur ti tegap, kelebih agi penyangkai kapal ti efisyen sereta dijaga enggau manah,” ku iya lebuh bejaku ba pengerami Apresiasi Media Pelabuhan Bintulu di sebuah hotel ditu, malam ensanus.
Ruslan madahka, penyangkai kapal besai Sarawak iya nya Penyangkai Kapal Bintulu, iya nya ke begulai ti ukai semina bisi eksport Gas Asli Cecair (LNG), tang
mega nyaditerminal eksport LNG pemadu besai di Asia Timur.
Nitihka iya, terminal kontena pemadu besai di Malaysia Timur nya mega besai agi ari semua kontena dalam semua lapan penyangkai kapal Sabah ti dipegulai.
“Outlet eksport besai produk minyak sawit Penyangkai Kapal Bintulu ungkup Sarawak meri asil 95 peratus ari eksport nengeri ti urung empat juta tan tiap taun.
“Kami ba penuduk ketiga di serata Malaysia enggau urung 50 juta tan setaun.
“Ari sukut rega tauka ungkus produk, kami ulih nyadi lumur satu, kelebih agi ketegal 450 kapal LNG ninting taun,” terang iya.
Nambah nya Ruslan madahka, siti kapal kargo berega beratus juta enggau bepelasarka itung iya, Penyangkai Kapal Bintulu enggau Penyangkai Kapal Samalaju enti dipegulai deka ulih nyaga produk berega urung setengah trilion ringgit setaun.
Pengerami Apresiasi Media Pelabuhan Bintulu nya sama digulu Sekretari Perintah Sarawak ti mega Chairman Setiausaha Bintulu Port Holdings Berhad Datuk Amar Mohamad Abu Bakar Marzuki.
Ba pengerami nya, Penyangkai Kapal Bintulu bisi nyuaka 14 anugerah kelai terima kasih ngagai ejensi perintah enggau swasta sereta raban pengarang berita kelimpah ari kelai pengaku ari Penyangkai Kapal Bintulu ketegal kerejasama enggau komitmen berita enggau publisiti semanjai taun 2023.