Sarawak enggau Brunei udah berandauka potensial agrodagang temuai: Dr Rundi
Dalam beratika kolaborasyen bekaul betanam betupi ti ulih ngangkatka ekonomi menua
KUCHING: Sarawak, Malaysia enggau Brunei Darussalam berandauka potensial kolaborasyen bekaul enggau betanam betupi ti nyengkaum pemansut agrodagang temuai.
Menteri Industri Pemakai, Komoditi enggau Pemansang Wilayah Sarawak, Dato Sri Dr. Stephen Rundi Utom madahka, nya entara pekara dikerandau maya nerima penemuai basa ari Menteri Pun Pemisi Besai (Primary Resouces) enggau Dagang Temuai Brunei Darussalam, Dato Dr. Abdul Manaf Metussin.
Dr. Rundi madahka Brunei bisi motivasyen deka nempa kerejasama sereta muji pekara ti dipejalaika perintah nengeri tu dalam pengawa betanam betupi kelebih agi ba pengawa nanam sereta ngeluarka padi.
“Entara sekeda bidang ti ditemu bagi ke bisi potensial kerejasama iya nya tikas nentuka pemisi pemakai, ti mekuh ngagai pengawa ngemansut enggau nanam padi.
“Baka ti udah ditemu, baka ti dipejalaika di Lubok Punggur, Gedong, kitai chukup bebendar deka ngiga chara ngemanahka agi enggau nambahka asil pemansut padi di Sarawak.
“Laban nama ti dikearapka kitai, iya nya ukai semina ulih nyendiaka padi ungkup Sarawak aja tang mega ungkup Malaysia,” ku iya madahka pekara nya maya baum pengarang berita pengudah iya nerima penemuai basa
Abdul Manaf sereta deligit iya di sebuah hotel ditu, malam ensanus.
Dr. Rundi madahka perintah nengeri ngemansangka kandang endur nanam padi ngena skala besai ti pemesai semua urung 10,000 hektar iya nya nyengkaum di Kampung Lubok Punggor, di Gedong; Spaoh di Betong, Tanjung Bijat di Sri Aman, Tanjung Purun di Lundu sereta di lebak Limbang.
Iya madahka kandang endur baru nanam padi nya dikemansang, berindik ari pemujur projek pemungkal
padi hibrid di Kampung Lubok Punggor di Gedong, ti dipejalaika Universiti Putra Malaysia (UPM) udah ngasilka padi ke ulih diketau tiga kali dalam timpuh 18 bulan.
Kena nyapai juluk nya, ku iya, Sarawak kelebih agi orang bumai enda patut betanam padi ngena chara asal(tradisional) tang patut nempa kolaboresyan baka enggau universiti.
“Aku chukup arap bendar bekaul enggau tikas nentuka pemisi pemakai senentang padi, (laban) kitai bisi bansa
tauka ‘variety’ padi ti manah, padi hibrid.
“Kitai ukai semina ulih napi peminta guna komuniti tauka local tang mega ulih napi peminta Malaysia.
“Nya alai perintah mesti datai mantu, laban pemar kea mat ditapi iya nya pasal infrastruktur baka parit enggau entali ai ti manah kelimpah ari input betanam betupi,” ku iya.
Kelimpah ari nya, pekara ti bisi dikerandau ku Dr. Rundi, iya nya komersial enggau industri betupi nyangkaum ari sukut ‘downstream’.
Nitih ku iya, Tahap Sara Diri (SSL) bekaul enggau ternakan(livestock) nengeri tu agi baruh iya nya entara 12.5 peratus , sereta nya alai penyampau chapi ke ditupi patut ditambahka.
“Pekara bukai ti mega dikerandau iya nya kerejasama dalam pemansang akuakultur ngambika dikomersial. Menteri (ari Brunei) tu deka meda bakani Brunei enggau Sarawak, ti udah tentu Malaysia ulih kolaborasyen ngena chara ‘win-win situation’.
“Sida deka nemu teknologi iya nya chara kena ngemanahka agi, kitai bekunsi penemu enggau sida,” ku iya mega seraya madah diri deka meda design tauka chara menua Brunei ti ditemu mujur ngemansangka pengawa betanam betupi, sereta deka dikemeranka di nengeri tu.
“Entara sekeda bidang ti ditemu bagi ke bisi potensial kerejasama iya nya tikas nentuka pemisi pemakai, ti mekuh ngagai pengawa ngemansut enggau ” nanam padi. Dato Sri Dr. Stephen Rundi Utom Menteri Industri Pemakai, Komoditi enggau Pemansang Wilayah Sarawak