Peranak Kpg Gunung Ngeli deka bisi balai raya ungkup ngatur aktiviti komuniti
Peranak genturung pendiau ba Kampung Gunung Ngeli di Simunjan deka bisi sebuah balai raya kediri empu alai ngatur aktiviti.
Kaban Kunsil Nengeri (ADUN) Simunjan, Awla Dris bepelasarka ripot Unit Komunikasi Awam Sarawak (UKAS) madahka, balai raya berega RM200,000 nya digaga ngena duit Program Transformasyen Menua Pesisir (RTP) ADUN Simunjan Taun 2024.
“Berengka ari taun baru, peranak Kampung Gunung Ngeli nadai agi ngena kanopi maya ngatur pengerami TahunBaru China laban sebuah balai raya deka digaga ditu ti nguntungka peranak ba kandang menua tu, alai ngatur aktiviti bekaul enggau komuniti.
“Ungkup belanja dikena ngagag balai raya tu iya nya sepenyampau RM200,000 ngena ungkup belanja RTP aku, sereta Opis Kereja Raya *JKR) nyadi ejensi ti nyaga projek balai raya nya ila,” ku iya.
Awla madahka pekara nya maya ngintu pengerami Taun Baru China 2024 Kampung Gunung Ngeli ensanus.
Awla meri puji ngagai tiga
Komiti Pemansang enggau Pengelikun Genturung Pendiau (JKKK) komuniti China di kandang menua Simunjan laban mujur ngatur pengerami serumpu malai lemai nyeruma Taun Baru China 2024, ke diitu enggau richah.
Iya arap bendar komuniti di Sarawak panjai runding bekaul enggau begulai enggau pangan diri kelebih agi di Simunjan, iya nya peranak ulih begulai manah enda ngira bansa.
Pengerami nya mega diperindang ngena tanda ari tiap JKKK, belagu karaoke bala temuai ke dikanggau enggau mega tanda pocopoco.
Sama bisi datai ba pengerami nya bini Awla, Napsiah Abang Kaderi; Pegawai Pelilih Menua Simunjan Seroji Ludin ngarika Kaban Parlimen Batang Sadong Rodiyah Sapiee, Ketuai Polis Pelilih Menua Simunjan DSP Rafhan Kepli, Pemanca China Kandang Menua Simunjan Liew Wee Tchiun, Chairman JKKK Kampung Gunung Ngeli Kapitan Lai Pian Sin, Chairman JKKK Pasar Simunjan Kapitan Liew Jau Kheng enggau Chairman JKKK Kampung Terasi Cina Kapitan Tan Chiew Sia.