Kandang endur SADA ngembuan potensial ngemansangka pengawa betanam betupi
Kandang endur Ejensi Pemansang Sri Aman (SADA) kelebih agi dalam sitak Kunsil Nengeri (DUN) Batang Ai bisi potensial alai ngemansangka pengawa betanam betupi komersial baka nanam sayur ngena chara hidroponik.
Sapit Menteri Dagang Antarabansa enggau Meranak Puku, ti mega Kaban Kunsil Nengeri (ADUN) Batang Ai, Datuk Malcom Mussen Lamoh kemari bisi ngelawa sereta beratika chara betanam sayur hidroponik ba EMMA Hydroponics Farm ditu.
Berindik ari kandang endur dalam DUN Batang Ai dikelala enggau pengawa nupi ikan dalam sangkar, Mussen bepenemu, pengawa nanam sayur hidroponik nya ulih dikereja begulai enggau pengawa betupi ikan.
“Tuju aku datai kitu laban deka belajar, deka ngerembaika tu (chara EMMA Hydroponics Farm), ngambika ulih bechuntoka tu lalu ditunda ba sitak ke diarika aku. Tu pengawa betanam ngena chara hidroponik. (Ba sitak aku) bisi siti kandang endur ke ulih alai ngaga baka tu.
“Sementara nganti ikan besai sereta ulih dijual, sida betanam betupi nya ulih betanam sayur hidroponik tu. Dua pengawa
tu ulih dipegulaika, ambis nadai sida ulih nambahka penatai pemisi seraya nganti ikan nya ulih dijual.
“Nya alai aku engka deka nguji chara tu ba sitak aku Batang Ai, iya nya kelimpah ari semina nupi ikan dalam sangkar kitai mega ulih begulaika enggau pengawa hidroponik tu,” ku iya seraya madah dipelaba mega deka nempa kerejasama enggau UNIMAS bekaul enggau chara bakani deka nambahka asil enggau kualiti ikan enggau sayur hidroponik.
Bejaku baru, Mussen ti mega Pengerusi Bersama SADA, lebuh dirandau raban pengarang berita pengudah ngelawa EMMA Hydroponics Farm madahka chara baru ti bekenaka teknologi IoT ti nyengkaum
ngena chara hidroponik ba pengawa betanam betupi ulih matak pengerindu rebak biak ngemeranka pengawa betanam betupi komersial.
Iya madahka pengawa betanam betupi ngena teknologi baru sereta kandang endur gawa ti kondusif udah nyadi trend sereta raban graduet majak ngambi bagi ba kereja nya.
“Nya kebuah aku meri sadang penemu minta sida tu (EMMA Hydroponics Farm) ngerembaika pengawa betanam hidroponik ti ngagai kandang menua bukai, seraya ulih ngerembaika dagang enggau nangkup peminta guna rayat.
“Perintah nengah bala menteri berandau pasal bakani chara deka meransang enggau matak rebak biak rindu tauka deka ngemeranka pengawa betanam betupi komersial,” ku iya.
Berindik ari pekara nya, kelimpah ari Opis Menteri Industri Pemakai, Komoditi enggau Pemansang Wilayah Sarawak sereta ejensi enggau opis betanam betupi, ku Mussen, opis menteri iya mega bisi nyendiaka bantu ngagai orang dagang ti berejista iya nya nyendiaka geran nengah skim mikro kredit.
“Nya ala kami chukup meransang orang dagang nyengkaum ke betanam betupi patut ngerejista diri awakka bisi lisin sereta bulih bantu ari perintah.
“Opis menteri kami bisi nyendiaka bantu bekaul enggau kereban infrastruktur ungkup orang dagang ti deka ngerembaika pengawa betanam betupi ngagai skala ti lebih besai, kelimpah ari sida ulih minta bantu ari opis menteri ti bekaul nyengkaum ba ejensi enggau opis betanam betupi,” ku iya.
Sama bisi ba aum pengarang berita nya kemari, Sapit Direktor, Pusat Perenacangan Strategik dan Pengurusan Kualiti,UNIMAS,ProfMadya Dr. Edwin Mit enggau Managing Director Emma Industries Sdn Bhd, Yu Kok Lee.