Nguji mantaika isu ‘bak kut teh’ ti diaku nyadi pemakai pesaka menua nya penemu mabu: Dr Yii

Sekeda pemesai tauka tuai apin lama ti bisi bekelikuhka pasal ‘bak kut teh’ ti diaku rasmi nyadi sebagi ari Pesaka Menua dianggap pabu penemu.

Kaban Parlimen Bandar Kuching, Dr. Kelvin Yii madahka, anggap tauka penemu pemesai tauka tuai pasal ‘bak kut teh’ ti diaku nyadi pemakai Pesaka Menua enda patut amat enti ketegal ‘bak kut teh’ enda halal, nya amat pabu enda meretika pesaka sejarah enggau budaya pemakai tu di menua kitai.

“‘Bak kut teh’ enggau 10 barang pemakai bukai ti nyengkaum ‘Kolo Mee’ ari Sarawak ti diaku nyadi Pemakai Pesaka Menua apin lama patut ia dikemegahka rayat Malaysia ti ngayanka pemayuh enggau pengaya budaya kitai nyadi sebuah pupu menua.

“Kitai semua mesti ngaku enggau beterima kasih ke pemayuh utai ti dikembuan di menua kitai nyengkaum pengaya budaya enggau pesaka, lalu dalam pemakai kitai patut ia beserakup ukai beserekang ketegal sentimen ti balat,” ku iya nengah penerang berita, ditu, kemari.

Komisioner Pesaka Opis Pesaka Menua, Mohamad Muda Bahadin kena 24 Februari apin lama bisi madahka ‘bak kut teh’, ‘burasak’, mi kolok enggau ‘nasi ambeng’ entara 10 bansa pemakai digazet nyadi pemakai pesaka menua dalam Pengisytiharan Objek Warisan 2024.

Nitihka iya, pemakai nya udah digazet nyadi objek pesaka nengah kuasa ti diberi ngagai iya ngena subseksyen 49(1) Akta Warisan Kebangsaan 2005 [Akta 645].

Taja pia Pemuda UMNO minta Menteri Besai, Datuk Seri Anwar Ibrahim iya nya menteri ti bekaul ke enggau ngaga pemutus ngaku ‘bak kut teh’ nyadi pemakai pesaka menua, dibuai kereja.

Ketuai iya, Dr Muhamad Akmal Saleh madahka, menteri nya enda berundingka sensitiviti rayat di menua tu nya alai udah datai ba maya iya Menteri Besai bejalaika atur nya.

Dr. Yii bebendar madahka, taja pan suah agi dipanduk enggau dagin babi, tang ‘Bak

Kut Teh’ enti disalin terus reti ia “Teh Tulang Daging’ ti ukai semina ungkup dagin babi, tang semua bansa dagin nyengkaum manuk ti dikumbai Chit Kut Teh, dagin lembu enggau kambin sereta pemakai tasik bukai.

“Pengawa ngaku pemakai nya patut dipeda bepelasarka asai enggau tisih khas pemakai nya empu, enggau sejarah sereta asal pemakai nyengkaum di menua kitai ukai semina halal tauka enda.

“Sama mega enggau pengawa ngaku ‘Kolo Mee’ ari Sarawak ti ulih disediaka ngena mayuh chara, hala tauka enda halal,” ku iya.

Iya madahka, enti dilakka nya ulih ngasuh rayat beserekang penemu, menua deka lenyau pengelebih besemekih enti dibandingka enggau menua ke semak ti udah ngansak ngaku pemakai pesaka dikena ngelakuka budaya enggau dagang temuai ngagai dunya.

“Nama ke patut, kitai patut beserakup sereta temegah ati ngagai pesaka kitai empu sereta terus ngetanka pemayuh budaya kitai,” ku iya.