KPWK deka lebih agresif ngiga enggau nambah bakih strategik KGC
SIBU: Opis Menteri Pemansang Indu, Nembiak Mit enggau Pengelantang Komuniti (KPWK) deka lebih agresif ngiga enggau nambahka bakih strategik Kenyalang Gold Card (KGC) taun tu.
Menteri iya, Dato Sri Fatimah Abdullah madahka, KGC iya nya siti ari inisiatif perintah nengeri ti meri awak ngagai raban swasta, badan korporat, kompeni, pasar besai enggau kedai ke deka meri diskaun tauka rebat ba produk enggau servis sida ngagai pemegai kad.
“Nya alai, kitai deka nambahka bakih strategik awakka kad tu ulih dikena enggau lebih serap agi,” ku iya lebuh bejaku ba pengerami nyuaka plak bakih strategik KGC ngagai Win Hotel ditu, kemari.
Kaban Kunsil Nengeri (ADUN) Dalat nya arap bendar mayuh ti deka nyadi bakih strategik KGC tang sida enda nemu bakani chara minta, dini alai ulih minta sekalika ngena chara manual iya nya ngambi sereta ngisi pom ba Opis Pegelantang Komuniti tauka ngisi pom online.
Di Bagi Menua Sibu, ku iya, diatu bisi 40 bakih strategik ti nyendiaka mayuh pengelebih
ngagai pemegai kad, sereta bisi 471 bakih strategik di serata Sarawak.
“Di Sibu, bisi 37,930 iku ari penyampau semua 273,979 iku pemegai KGC,” terang iya seraya madah, KGC ulih dipinta semua orang tuai ti beumur 60 taun ke atas.
Win Hotel ti nyadi bakih strategik baru, ku iya, bisi nyendiaka rega korporat ungkup rega bilik ke bisi disediaka ba hotel nya.
Kelimpah ari Win Hotel, bakih strategik di Sibu iya nya Sibu Specialist Medical Centre, Ban Siew Casket, 20DB Hearing Sdn Bhd enggau mayuh agi ke bukai.
Ngenang pasal ubah Bantuan Ihsan Kematian (BIK) ke diberi ngagai pemegai KGC, Fatimah madahka, ubah nya ila dikearapka ulih meri penguntung ti lebih ngagai pemegai kad maya sida agi idup.
“Kitai udah meresa baru bantu sereta enggau pemendar ari perintah nengeri, dikearapka ulih berengkah taun tu. Kitai deka berengkah ari raban B40, iya nya meri penguntung perubat ngagai sida.
“Enti pemegai KGC tu berubat ngagai panel pengerai kitai, bayar perubat nya deka terus ditulak ari penyampau ti diberi ngagai pemegai kad,” terang iya seraya madah penyampau bantu nya setaun deka ditetapka dudi.
Nitihka Fatimah, reti iya maya pemegai kad nya agi idup, sida ulih ngena KGC berubat di klinik enggau sepital swasta awakka sida enda ibuh bebaris lama berubat di sepital perintah.
Nitihka penerang, BIK ti sepenyampau RM3,000 deka dikurang sereta diberi ngagai pemegai kad awakka bisi deka berubat.
Sama bisi datai ba pengerami nya Manijar Win Hotel Desmond Leong, Tuai Pampang Bantu Pengelantang Rama Opis Pengelantang Komuniti Sarawak Rohana Isnawi sereta Pegawai Opis Pengelantang Komuniti Sarawak Bagi Menua Sibu Tang Kee Lee.