Perintah Sarawak chakah ngenegapka ekonomi orang indu
Perintah Sarawak terus chakah ngenegapka ekonomi orang indu di nengeri tu, ku Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah.
Nitihka iya, chukai jual enggau servis (SST) ti ditiki ari 6 ngagai 8 peratus berengkah 1 Mac 2024 mega deka sama diasaika raban B40.
“Baka ti ditemu kitai iya nya SST sehari tu (kemari) udah ditikika, (enti) ngelawa kedai makai, bebeli barang, ungkus ia niki.
“Tu pekara ti patut diputarka, ungkus barang ti dikena kitai tiap hari, kelebih agi pemakai, niki rega, enda nemu nurun,” ku iya.
Iya madahka pekara nya maya bejadi ‘Jelajah Kerjaya Wanita Sarawak Siri 1/2024 Bahagian Sibu’ ti diatur di Pintu Gerbang Sibu, ditu, kemari.
Sama bisi datai, Direktor Opis Indu enggau Ruang Bilik Sarawak (JWKS) Salmah Jobeli.
Fatimah madahka, raban B40 deka ngasaika empas ari penyampau SST nya laban penatai pemisi sida enda tetangkupka penyampau rega barang ke niki.
“Raban B40 kelebih agi gaji sida naka nya aja. Tang barang majak mar baka enda setipak.
“Nya kebuah kami di JWKS deka ke indu kitai di Sarawak ngenegapka ekonomi ruang bilik awakka raban B40 ke bisi penatai pemisi ti enda meruan deka dibantu.
“Sida patut makai enggau bebelanja tang ungkus ia majak tinggi,” ku iya ti mega Kaban Kunsil Nengeri (ADUN) Dalat.
Fatimah madahka, nitihka pematut nya kebuah perintah deka ngenegapka ekonomi orang indu.
Nyaalai,iyameransangorang indu ke bisi pengelandik patut ngena pengelandik nya ngenegapka ekonomi diri empu.
“Giga chara, enti bisi pengelandik, kena. Kami ari opis tauka opis menteri bisi geran perintah kena mantu kita, diberi ngagai raban indu.
“Kami bisi nyendiaka mayuh bantu kena mantu kita nyungkakka ekonomi,” ku iya seraya nerangka entara bantu ke bisi disediaka perintah iya nya Bantuan Ketua Isi Rumah Wanita Sarawak (KIRWaS), Caruman Minimum i-SURI enggau Geran Modal Pemerkasaan Wanita Sarawak.
Ngenang pasal KIRWaS enggau Geran Modal Pemerkasaan Wanita Sarawak, Fatimah madahka, bisi 43 ari 143 iku iya nya penerima di Bagi Menua Sibu.
Kelimpah ari nya, Fatimah ngarapka program nya deka meri penguntung besai ngagai sida ke ngambi bagi enggau penyereta orang indu deka nyungkakka tikas ekonomi sida seraya nentuka dagang diatur enggau manah sereta ulih betan.
“Kena nyapai juluk nya, pengawa ngatur program tu bisi bekaul enggau sekeda kompenen iya nya keterubah , lisin dagang ti bekaul enggau ejensi pengerejista kena mantu ngerejista dagang orang dagang indu awakka dipejalaika enggau sah.
“Kompenan kedua, bekaul enggau ejensi perintah enggau ukai perintah ti nyendiaka mayuh servis, bantu, geran enggau nginjau dikena bedagang kena mantu orang dagang indu nambahka modal enggau ngemanahka agi kereban dagang kena ngasilka penatai pemisi lebih tinggi.
“Lalu komponen ketiga iya nya latih orang dagang digital kena nambahka pengelandik oarng dagang indu Sarawak,” ku iya.