Bulih empat KPI standard antarabansa Sarawak dipilih nyadi tuai rumah Hari Penjara ke-234
Pengelebih bulih empat Indikator Kunci Prestasi Utama (KPI) nitihka standard antarabansa kebuah Sarawak dipilih nyadi tuai rumah pengerami Hari Penjara ke-234.
Menteri Dalam Nengeri Datuk Seri Saifuddin Nasution Ismail madahka, empat indikator nya nyengkaum kadar penyekut, penyampau reman tauka ditan , kadar residivis (jenayah betandu) enggau kadar dijil.
Ku iya, penyulut ba empat indikator nya udah ngujungka Opis Jil Sarawak nyadi penerima Anugerah Penjara Negeri Cemerlang Tahun 2023.
“Sarawak bisi pengelebih ti ulih dipeda iya nya Opis Jil Sarawak bulih empat KPI ti ditetapka iya nya peratus penyekut bisi -13.2 peratus kadar penyekut.
“Kedua, penyampau reman iya nya 13.5 peratus, ketiga, kitai meda residivis iya nya lebuh prospek dilepaska lalu peratus tama baru ke rumah jil ketegal nandu penyalah di Sarawak baruh iya nya 12.7 peratus.
“Tiga iti pekara nya ditentu bepelasarka tikas standard antarabansa ti ditetapka iya nya ba tikas 20 peratus,” ku iya.
Iya madahka pekara nya maya baum pengarang berita pengudah bejadi pengerami Hari Penjara Ke-234 di Kompleks Penjara Puncak Borneo ditu, kemari.
Bejaku baru iya madahka indikator ke-4 ti mujur dijapai Sarawak iya nya kadar dijil iya nya 119 ke tiap 100,000 peranak dibandingka enggau standard antarabansa iya nya 145 ke tiap 100,000.
“Taja pia, kitai enda patut jampat puas ati enggau ke diulih diatu. Taja pan Sarawak bisi tikas penyekut sepenyampau -13.2 peratus, kitai patut ngetanka penyulut tu.
“Ia enda tau nyadi balat ari nya. Tu penguji ngagai Sarawak,” ku iya.
Dulu ari nya, Saifuddin maya macha teks jaku Sapit Menteri Besai Datuk Seri Fadillah Yusof madahka, perintah nengah KDN seruran nyukung pengawa Opis Jil Malaysia kena nyumanka orang jil nengah programngenyuman ti dilanggur sekalika di dalam tauka diluar rumah jil awakka ulih dipejalaika enggau mujur.
“Kitai komited mantu Opis Jil Malaysia bejalaika reformasyen koreksional laban ia beguna dalam ngemansangka ulah manah ba raban prospek seraya mantu proses ngenyuman sida begulai enggau komuniti.
“Tu ngayanka pengeran perintah ti ukai semina negika undang-undang, tang mega nyukung pengawa ngenyuman dalam sistem jil setipak enggau agenda Malaysia Madani,” ku iya.
Sama bisi datai, Komisioner Jeneral Opis Jil Malaysia Datuk Nordin Muhamad sereta sida ke bukai.