Strategi lebih berani, chakah ngelakuka mengeri besai Miri di renggat antarabansa
Sarawak deka bejalaika strategi ti lebih berani sereta chakah dalam ngelakuka mengeri besai Miri di renggat antarabansa kena besedia napi Taun Nemuai Malaysia 2026, ti fokus ngagai ekodagang temuai, ngemeratka peneleba nyelai enggau tanggungpengawa.
Sapit Menteri Dagang Temuai, Industri Kreatif enggau Seni Pemerindang Datuk Sebastian TIng madahka, pengeran ngulihka nya begunaka pemansang infrastruktur ti meruan awakka setipak enggau penumbuh dagang temuai ti ngembuan pemanah asal sereta ngurangka empas rampa menua.
“Kena nyapai juluk tu, semua pemegai entaruh, nyengkaum perintah, orang dagang menua tu, komuniti, enggau temuai mesti chakah bekerejasama.
“Semua patut bejalaika tanggungpengawa diri empu enggau ukai semina bepanggai ngagai perintah laban ia tanggungpengawa semua pemegai entaruh,” ku iya maya bejaku lalu bejadi Pesta Bubuk Miri Ke-4 2024 ti diatur di Pasar Nelayan Kampung Batu 1, Kuala Baram ditu, kemari.
Iya ngarika Menteri Dagang Temuai, Industri Keratif enggau Seni Pemerindang, Dato Sri Abdul Karim Rahman
Hamzah.
Nitihka Ting, nengah pengawa ngemanahka agi infrastruktur enggau kereban ba mayuh palan pematak dagang temuai enggau penembu Lebuh Raya Pan Borneo, udah tentu temuai deka nyerungkai Sarawak nyengkaum di Miri enggau lanchar.
“Perintah Sarawak pechaya kitai ulih nyapai juluk matak empat juta temuai datai ke Sarawak ba taun 2024,” ku iya.
Ngenang pengawa bejadi Pesta Bubuk Miri ke-4 taun tu, Ting madahka, pengerami
nya chunto kerejasama manah entara semua orang dalam ngenegapka dagang temuai di mengeri besai Miri enggau nyukung juluk perintah ti fokus ngagai Strategi Pemansang Pengudah COVID-19 ti deka nyadika Sarawak nengeri pemadu maju bepelasarka ekonomi ti belimpah.
Iya mega meransang komiti pengatur ngambika ulih ngelanjarka program Pesta Bubuk nya pengelama tiga hari iya nya Hari Lima, Enam enggau Hari Minggu, kena meri awak ngagai mayuh agi orang datai, kelebih agi
ari menua Brunei Darussalam ti suah datai ba ujung minggu.
Ngenang belacan Miri ti tebilang laban bisi pengelebih enggau peminta, Ting deka ke ia dipaten, baka belacan Bintulu ti udah dipatenka.
Ngena chara nya, ku iya, ulih dikelaku sereta dijual ngelui ari garis antaramenua.
Sama bisi datai Datuk Bandar Miri Adam Yii, Pemangku Sekretari Majlis Bandaraya Miri Siti Suhana Rosli sereta Chairman Komiti Pemansang Dagang Temuai Majlis Bandaraya Miri Kaunselor John Trawe.