Nembiak ti nurun sekula ngena motosikal patut bisi lisin, ku Lee
MIRI: Menteri Pengangkut Sarawak Dato Sri Lee Kim Shin deka ke nembiak ti nurun sekula ngena motosikal bisi lisin Kelas B2.
Iya mega ngingatka bala nembiak patut betopi kelida kena nyaga pengelikun diri maya ba jalai raya.
“Aku deka ke nembiak bisi lisin, pulai mansang ke sekula enggau likun, nya ti dikedeka aku,” ku iya.
Bejaku ngagai bisi 478 iku orang ti ngambi Bantuan Lesen Memandu (BLM) MyLesen Kelas B2 ditu, kemari, Lee madah taga penyampau nembiak masuk program nya bisi 1,000 iku.
Sida nya raban keterubah masuk program nya sereta raban kedua mega deka diatur.
Nitihka Lee, bepelasarka penerang ari pengajar iya nya mayuh nembiak bekenaka motosikal nurun sekula nadai lisin enggau enda bekenaka topi kelida.
Nya alai ku Lee, iya minta kerejasama Opis Pengangkut Darat (JPJ) ngambika bala nembiak ulih sama enggau ngambi bagi ba program nya.
“Kitai nanya pengajar, berapa iku ke bisi lisin, mayuh ti nadai lisin enggau nadai bekenaka topi kelida. Penanggul ditu, bakani chara ulih mantu nembiak bulih lisin. Kitai deka ke sida bisi lisin, nitihka undang-undang sereta deriba enggau likun,” terang Lee.
Iya ti mega Kaban Kunsil Nengeri (ADUN) Senadin madahka, nembiak ke masuk program nya semina
mayar sepenyampau RM250 dibandingka enggau RM750
kena mayar kus enggau peresa ba sekula deriba.
Pengudah penerang nya dibantaika, JPJ bisi nerima
672 iku penyereta tang semina 609 iku ti ulih enggau.
Taja pia, program ti diatur di Dewan Dato Permaisuri di Bandar Baru Permyjaya nya semina digulu 478 iku nyengkaum sida ke ‘walkin.’
Nembiak ke bisi masuk program nya nyengkaum ari SMK Pujut, SMK Baru, SMK Lutong, SMK Riam, SMK St Joseph, SMK St Columba, SMK Chung Hua, SMK Luak, SMK Dato Permaisuri, Kolej Vokasional, Kolej Tun Datu Tuanku Haji Bujang, SMK Taman Tunku, SMK Merbau enggau SMK Lopeng Tengah.
Kus nya diatur Institut Memandu Miri Subis Sdn Bhd enggau Institut Memandu City Miri Sdn Bhd.
Lee madahka, program ti sebaka deka terus diatur ba genturung pendiau ditu.