Sarawak komited dalam pemansang pengawa berumah
Projek Palan Pengentap Pendiau Sungai Bedaun kelai komitmen tinggi perintah GPS setipak enggau PCDS 2030
KUCHING: Projek Palan Pengentap Pendiau Bedaun ditu kelai komitmen tinggi perintah Gabungan Parti Sarawak (GPS) dalam nyendiaka pelin ngelangkar pengawa berumah ti komprehensif setipak enggau Strategi Pemansang Pengudah COVID-19 (PCDS) 2030.
Premier Sarawak Datuk Patinggi Tan Sri Abang johari Tun Openg madah, strategi pemansang tu udah dilangkar dalam betapi enggau isu sereta penanggul dalam dagang pengawa berumah ti nentuka rayat kelebih agi raban B40 bulih akses ngagai peluang ngempu rumah.
“Projek pengawa berumah baka model rumah enggau rega ti setipak tu deka dikerembai ngagai sekeda kandang menua ke bukai baka Gedong, Asajaya, Sebuyau, Kabong, Sungai Baji di Sarikei, Kemuyang di Sibu, Jepak di Bintulu enggau Kapit.
“Tu nyadika kelai perintah Sarawak ke siru enggau megai tanggungpengawa dalam ngemansangka tikas pengidup komuniti ti inklusif ungkup semua rayat Sarawak,” ku iya.
Iya madah munyi tu dalam teks jaku ti dibacha Sapit Menteri Utiliti enggau Telekomunikasyen Datuk Dr Abdul Rahman Junidi maya pengerami nyuaka kunchi rumah ungkup Projek Palan Pengentap Pendiau Sungai Bedaun kemari.
Sama bisi datai Menteri Emansang Orang Indu, Ruang Bilik enggau Komuniti ti mega Kaban Parlimen Santubong Dato Sri
Nancy Shukri, Sapit Menteri Infrastruktur enggau Pemansang Palan Penyangkai Kapal Datuk Aidel Lariwoo, Menijer Besai Opis Pemansang enggau Ngintu Tanah (LCDA) Datu Monaliza Zaidel enggau bala bukai.
Ku Abang Johari nambah, perintah mega chakah bejalaika skim palan pengentap pendiau ungkup rayat nyengkaum Skim Palan Pengentap Pendiau Baru (SPS) enggau Skim Mesaika Genturung Pendiau (SPK).
Skim tu mega disikap
enggau infrastruktur pemun baka parit semin, jalai belakin, lampu jalai enggau perengkaguna ke bukai ti diguna dalam nentuka palan pengentap pendiau rayat ke
disediaka tu berurun enggau moden.
Bejaku bekaul enggau Projek Palan Pengentap Pendiau Sungai Bedaun, Abang Johari madahka perintah Sarawak
udah besetuju deka ngaga sebuah masjid baru ba genturung pendiau nya dalam pakej kedua.
Pengawa ngaga masjid tu iya nya ungkup guna peranak dalam genturung pendiau Sungai Bedaun enggau kandang menua ti ngelingi nya baka Kampung Sungai Batu, Kampung Sungai Bedaun enggau Kampung Sungai Lumut sereta bala ti datai ari luar ke ngena Jalai Sultan Tengah.
Kelimpah ari tu, perintah Sarawak mega deka ngaga sebuah balai komuniti di kandang menua tu dikena nentuka peranak ba palan pengentap pendiau tu ulih ngatur pengawa rama enggau rekreasyen sida.
Projek Pengawa Berumah Sungai Bedaun dikemansangka LCDA ba kandang menua pemesai urung 108.26 ikar dikena ungkup ruang biik tambah ti bisi kaul dalam Projek Pemansang Darul Hana.
Projek tu ngaul pengawa ngaga 426 unit rumah ke alai pakej keterubah ngaul bisi 209 unit rumah ke udah tembu lalu pakej kedua bisi 217 unit rumah ke deka digaga kena bulan Jun taun tu lalu dipelabaka tembu suku ketiga taun 2026.
Projek pengawa berumah baka model rumah enggau rega ti setipak tu deka dikerembai ngagai sekeda kandang menua ke bukai baka Gedong, Asajaya, Sebuyau, Kabong, Sungai Baji di Sarikei, Kemuyang di Sibu, Jepak di Bintulu enggau Kapit.
Datuk Patinggi Tan Sri Abang Johari Tun Openg