JKWS ngagihka RM2.5 juta ungkup orang indu ngepunka dagang
SARIKEI: Program Jelajah Kerjaya Wanita Sarawak (JKWS) udah ngagihka RM2.5 juta ungkup pengawa bejalaika Geran Modal Ngenegapka Orang Indu Sarawak.
Menter Pemansang Orang Indu, Nembiak Mit enggau Pengelantang Komuniti Dato Sri Hajah Fatimah Abdullah madah, geran Modal Ngenegapka Orang Indu Sarawak tu iya nya nengah chara meri kereban dagang sepenyampau RM2,000 ungkup siku pesereta.
“Program tu mekuh ngagai raban orang indu Sarawak ti beumur 18 taun ke atas ti dalam raban B40.
“Di bagi menua Sarikei bisi 164 iku orang dagang udah nerima perengka kenyau ari pun bulan Januari taun tu enggau penyampau semua penerima iya nya 1,274 iku.
“Berindik ari tu kami ngarapka bala penerima deka ngena memanah geran modal tu dalam ngemansangka dagang dri,” ku Fatimah.
Iya madah munyi tu lebuh Pengerami Nyuaka Geran Modal Ngenegapka Orang Indu Sarawak Sarikei ti diatur
ba Dewan Sri Nyelong Sarikei, kena Hari Dua nyin tadi.
Nitih ku Fatimah, JKWS endang komited ngagai pemansang pengawa ungkup orang indu di Sarawak, kelebih agi dikena ngangkatka tikas penyedar bekaul enggau servis ke diberi ari ejensi perintah ngagai pemansang pengawa orang indu.
Ku iya, nengah program tu deka meri peluang enggau penerang bekaul enggau pengawa orang indu dalam sektor ekonomi formal enggau
sektor informal sereta ngangkatka akses enggau penyereta orang indu dalam komuniti.
“Empas timpuh panjai program JWKS tu iya nya ari sukut ikas ekonomi orang indu di Sarawak dalam nentuka dagang tu disereta ulih diintu enggau manah sereta meruan.
“Berindik ari tu, raban opis menteri nengah JWKS deka terus ngatur kolaborasyen enggau bakih strategik dalam ngenegapka tikas runding
orang indu Sarawak lalu nentuka pemeruan ruang bilik nengah inisiatif bungkur inovasyen rama setipak enggau aspirasyen PCDS 2030 dalam sektor servis rama,” ku Fatimah nerang.
Sama bisi dalam pengerami tu iya nya Pemangku Sekretari Mendam Pemansang Orang Indu, Nembiak Mit enggau Pengelantang Komuniti Sarawak Nur Alina enggau Direktor Opis Orang Indu enggau Ruang Bilik Sarawak Salimah Jobeli.