Pengereja pengawa JTS dipinta nguasa teknologi baru, ngenegapka pengelandik
KUCHING: Raban Opis Tanah enggau Survei (JTS) Sarawak dilalau nguasa teknologi baru dikena ngemuntangka pengawa.
Sapit Premier Sarawak Datuk Amar Awang Tengah Ali Hasan madah, pengelandik dalam teknologi tu setipak enggau pengeransing perintah Sarawak dalam bejalaika ekonomi digital enggau mega ekonomi baru.
“Nyadi raban ti bejalaika pengawa perintah, kitai patut terus ngenegapka pengelandik enggau meretika teknologi ti dikena.
“Pengarap rayat chukup tinggi, nya alai kitai patut ngenegapka semua pengawa kitai enggau manah.
“Pia mega, kitai udah bisi tanggungpengawa bejalaika nama pan polisi enggau program ke diatur perintah,” ku iya.
Iya madah munyi tu lebuh Pengerami Nutup Karnival Lumba enggau Main Opis Tanah enggau Survei Sarawak (LASSCAR) 2024 di Palan Konvensyen Penview ditu, kena malam Hari Enam.
Sama bisi Direktor JTS Sarawak Datu Abdullah Julaihi, Sekretari Mendam Opis Menteri Pengeraja Asal enggau Pemansang Mengeri Datu Zaidi Mahdi enggau temuai dipebasa ke bukai.
Awang Tengah madah, pengerami lumba enggau main ti ngaul mayuh macham unit ari JTS Sarawak tu iya nya sebagi ari platform ke manah ungkup tuju tu.
Ku iya, tu ukai semina ulih nemu tikas pengelandik baru ke ulih dibantaika nyadi aset dalam nentuka penyulut sebuah organisasyen, pia mega ngangkatka agi tikas runding enggau pengerai pengereja pengawa.
“Kitai ngembuan tanggungpengawa besai nama agi diatu kitai bejalaika Strategi Pemansang Pengudah COVID-19 2030 (PCDS 2030), mayuh pekara ke patut dipejalaika kitai.
“Pia mega, kitai patut nyaga pengerai kitai, tubuh ti regas udah tentu deka nentuka runding ti manah,” ku iya.
Awang Tengah madah, tetiap raban pengereja pengawa perintah bejalaika tanggungpengawa dalam tetiap projek, program tauka polisi perintah.
“Berindik ari tu, kitai deka meda sida dalam gaya ti seruran besedia bejalaika nya. Jaga pengerai lalu lumba enggau main tu mih sebagi ari nya,” ku iya nambah.
Dulu ari tu, pengerami lumba enggau main tu udah ngayanka JTS Bagi Menua Kuching udah nyadi champion.