ISKCON udah meri bantu pemakai ngagai PPS di Kuching
KUCHING: Persatuan Kesedaran Krishna Antarabangsa (ISKCON) Kuching udah meri bantu ngagai soda ti tasah dituntung penusah ampuh bah ke diau di Palan Ngenduh Sementara (PPS) ditu.
Kaban Kunsil Nengeri (ADUN) Batu Kitang Datuk Lo Khere Chiang madah, bisi 300 bungkus pemakai bela diagihka ngagai PPS Balai Komuniti Stapok enggau PPS Balai R-Piang Kampung Sinar Budi Baru.
“Mayuh ari sida ti tasah tu iya nya ari kandang menua Desa Wira enggau Batu Kawa ti dipindahka berindik ari ampuh bah ti nyadi di genturung pendiau sida kenyau ari kemari (Hari Enam).
“Beserimbai enggau tu, kitai mega chukup andal ati enggau beterima kasih ngagai kaban ISKCON laban ti siru ngagai sida ti tasah tu enggau meri bantu pemakai ngagai sida,” ku iya lebuh ditanya di Balai Komuniti Stapok ditu, kemari.
Lo madahka asai sinu meda sida ti tasah tu kelebih agi ti ngaul nembiak mit enggau orang lunggar umur.
“Aku ngarapka bantu baka tu ulih ngerindangka ati sida.
“Pia mega aku ngelalau semua komuniti di kandang menua Kuching, nyema bisi ulih, meli pemakai rangkai lalu diberi ngagai PPS,” ku iya.
Beserimbai enggau tu Chairman ISKCON Kuching Prabu Kripa madahka pengawa meri pemakai enda bebayar tu iya nya sebagi ari aktiviti ngintu pengelantang pendiau gerempung dikena mantu sida ti begunaka nya.
“Kitai udah nyendiaka urung 600 bungkus asi lemak vegetarian lalu selalu nya datai ke mayuh palan baka rumah ngintu pengelantang pendiau, pasar enggau genturung pendiau ngambika nyading pemakai.
“Taja pia, ke seharitu (3 Mac), Datuk Lo merambu ngambika kitai ngagihka pemakai ngagai sida ti tasah penusah ampuh bah,” ku iya.
Iya mega madahka ISKCON Kuching andal ati ulih meri bantu ngagai sida ti begunaka nya enda ngira penatai asal.
“Kitai mega ngelaluka mensia mayuh meri bantu ari sukut barang baka barang nyumai, ngambika ulih dikena ungkup aktiviti pengasih,” ku iya.
Sama bisi datai iya nya Sekretari Politik Premier Kho Teck Wan ti ngarika Sapit Premier Sarawak Datuk Amar Dr Sim Kui Hian.