Ampuh bah tunggal, apat majak mayuh kelai pemeruan rampa menua patut dikemerat
SIBU: Ujan ti bangat berapa hari ke udah ba kandang menua ulu Sungai Katibas, Song udah ngasuh ati irau bekaul enggau pemeruan pengeraja asal enggau jelu ba kandang menua tu.
Ampuh bah tunggal ti mai apat enggau luchak ukai semina ti ngasuh sungai kamah tang mega ngujungka pemati jelu siga di semanjai arus sungai tu.
Kaban Kunsil Nengeri (ADUN) Katibas Lidam Assan madahak utai ke nyadi tu nyadika kelai ti berat ngagai guna dalam nyaga enggau ngintu ekosistem sungai.
Iya mega nyemetak minta semua raban ngambika enda nebang pun kayu di tebing sungai nyadika chara bejejaga mutarka penanggul tu.
“Pengawa nyaga tebing sungai endang beguna dalam ngurangka pemisi apat ke anyut lalu ulih ngasuh sungai kamah,” ku iya lebuh ti ditanya bekaul enggau pekara tu.
Dalam pengawa mutarka penanggul tu, Lidam Assan mai semua raban, nyengkaum ejensi rampa menua ngambika matau pekara tu nitihka timpuh.
Pia mega Lidam madah, pengawa tu dikearapka ulih nentuka pemeresi sungai tu ulih tejaga lalu nyaga ekosistem ti majak rusak.
Iya mega nyemetak madahka pekara ti nyadi tu ptut nya nyadika lalau ngagai semua raban ngambika terus ngemeratka bekaul enggau empas negatif aktiviti mensia mayuh ngagai rampa menua.
Berindik ari tu, Liam ngarapka komuniti enggau raban ti bekuasa ulih bekerejasama rat dalam nyaga pemeruan
rampa menua lalu ngintu Sungai Katibas ari ti majak rusak.
Kelimpah ari tu, iya mega meri jaku lalau ngagai peranak di genturung pendiau ke diau ba semanjai sungai ngambika bejejaga lalu seruran ngintu diri, jkelebih agi lebuh ti ngena bot.
“Aku minta semua raban begulai sama dalam pemeruan rampa menua ungkup pengelantang komuniti enggau rebak ti deka datai,” ku iya.