Kontraktor penyelamat chakah nembuka ‘projek sakit’: Uggah
Kontraktor penyelamat neruska laluh pengawa tauka pengawa ngangkatmanah ti enda tembu ungkup ketetiga projek
KUCHING: Sapit Premier Sarawak Datuk Amar Douglas Uggah Embas lantang ati pengudah kontraktor penyelamat ti nyambung ngaga ‘projek sakit’ ngayanka pengeransing dalam nembuka projek tu.
Iya madah munyi tu lebuh ti ngatur program ngelawa tiga buah projek di Serian kena Hari Enam nyin tadi, iya nya jalai alun baru semanjai 6.3 kilometer ti nyambung Jalai Kampung Tanjung Bako enggau Jalai Kuching’Jalai Besai Samarahan di Jalai Tebing Sungai Sarawak di Samarahan enggau jalai alun baru dua lurung baru semanjai 5.7 kilometer ke jematan Batang Lupar 1 di Sebuyau.
Siti agi projek ngangkatmanah Jalai Padawan (Fasa 1) semanjai 14.9 kilometer ba bagi menua Serian.
Bejaku enggau pengarang berita pengudah ngelawa projek Jalai Padawan, Uggah ti mega Menteri Infrastruktur enggau Pemansang Palan Penyangkai Kapal madahka kontraktor penyelamat neruska laluh pengawa ngaga tauka ngangkatmanah ketetiga projek tu.
“Kontraktor sebedau tu udah diketuka kontrak laban ti enda ulih bejalaika pengawa nitihka udah ditetapka.
“Aku chukup temegah ati lebuh kontraktor baru tu bejalaika pengawa nitihka timpuh ditetapka. Aku ngarapka sida deka neruska momentum sida. Kitai enda ulih bisi agi projek ti betangguh,” ku iya.
Iya mega nambah, lebuh
projek udah dikemendarka enggau dipejalai, rayat ngarapka tu ulih ditembuka nitihka timpuh ke ditetapka.
Perintah ku iya, mega
ngembuan pengarap ke sama tang bisi mega kontraktor betapi enggau penanggul lalu sida patut diganti enggau ke baru.
“Nya alai, kontraktor baru ti dichiri dalam nyelamatka projek tu enggau pengarap sida ulih nembuka tu.
“Kitai deka terus matau rat semua projek di selampur nengeri ke udah diberi ngagai kontraktor penyelamat,” ku iya.
Bekaul enggau jalai ti nyambung Jematan Batang Lupar 1, iya madahka tu komponen ti endang kritikal.
“Nama ke dikenggai kitai iya nya jematan udah tembu tang jalai bedau. Nya alai kitai udah berandau enggau kotraktor baru.
“Bisi sekeda isu tang baka ke udah diputarka diatu ungkup JKR (Opis Kereja Raya) enggau kotraktor ngaga analisis jalai ti kritikal dalam nentuka tu ulih ditembuka.
“Kami udah besetuju dalam ngaga ‘timeline’ ungkup jalai enggau ungkus RM107.5 juta tu ditembuka dulu... Ngarapka ba bulan November 2025.
“Kebuah pia laban kitai benung meda langkar ungkup jematan tu tembu sebulan udah nya (Disember 2025),” ku iya seraya nambah, maya bulan Januari 2026, jematan udah ulih dibuka ngagai mensia mayuh.
Bekaul enggau projek jalai alun beungkus RM106.968 juta ti nyambung Jalai Kampung tanjung Bako enggau Jalai Besai Jalai Kuching/ Samarahan di Jalai Pantai Sarawak, Uggah madah tu udah disuaka ngagai kontraktor baru kena 8 Ogos 2023.
Nitih ku iya, projek tu dipelabaka tembu tumu ba pun Februari 2026 lalu diatu udah tembu 5.2 peratus dibandingka ari timpuh ti dipelabaka maya tu iya nya 4.55 peratus.
Bekaul enggau pengawa ngangkatmanah Jalai Padawan (Fasa 1), iya madahka kontraktor baru ke dichiri aja ti ngambi projek kena 16 Februari 2024.
“Kami ngarapka tu deka tembu kena 15 Ogos 2026,” ku iya.
Sama bisi datai iya nya Sekretari Mendam Opis Menteri Infrastruktur enggau Pemansang Palan Penyangkai Kapal Datu Chiew Chee Yaw enggau Sapit Direktor JKR Cassidy Morris.
“Kontraktor sebedau tu udah diketuka kontrak laban ti enda ulih bejalaika pengawa nitihka udah ” ditetapka. Datuk Amar Douglas Uggah Embas Sapit Premier Sarawak