Fatimah: Sepital Sarikei udah nerima dua injin hemodialisis baru, ngangkatka servis pengerai
Dua buah injin hemodialisis deka disuaka ngagai Sepital Sarikei dikena nangkup guna di sepital tu, ku Menteri Pemansang Orang Indu, Nembiak Mit enggau Pengelantang Komuniti Dato Sri Hajah Fatimah Abdullah.
Ku iya, bantu enggau pemisi injin tambah tu deka ulih nentuka mayuh perengkaguna dikena bala pesakit di sepital tu.
“Kededua injin tu iya nya beungkus RM82,300 lalu tetiap sebuah injin tu berega RM41,150.
“Dalam taun 2023, Opis Pengintu Pengelantang Pen- diau Komuniti Sarawak udah meli 24 buah injin hemodialisis ngena chara tinda.
“PEnyampau semua belanja ti dikena Opis Pengintu Pengelantang Pendiau Komuniti Sarawak dikena meli 24 buah injin tu iya nya sepenyampau RM987,600,” ku Fatimah.
Iya madah munyi tu ba Pengerami Nyuaka Injin Hemodialisis ari baruh Inisiatif Bantu Khas Pesakit Tungkul Sengayuh ba Dewan Sepital Sarikei, bedau lama ti udah.
Nitih ku Fatimah, injin tu udah diengkah ba 11 buah sepital, sebuah di sepital tungkul ati lalu dua di klinik
dalam nengeri tu.
“Sebuah injin tu udah diengkah ba Sepital Tungkul Ati Sarawak, dua di Sepital Lundu, sebuah di Sepital Serian, tiga di Sepital Betong, sebuah di Klinik Pengerai Debak, sebuah di Sepital Saratok, sebuah di Sepital Kanowit, tiga buah di Sepital Mukah, sebuah di Sepital Dalat, sua di Sepital Sarikei, sua di Klinik Pengerai Tatau, tiga di Sepital Bintulu, sebuah di Sepital imbang lalu dua di Sepital Lawas.
“Ba taun 2021, bisi enam buah injin hemodialisis udah disuaka ngagai lima buah institusyen pengerai di selampur
Sarawak.
“Palan endur ngengkah enggau nambah injin tu di selampur Sarawak iya nya ngira guna pesakit laban penambah penyampau pesakit tungkul sengayuh ti berubat, nganti injin ke udah lama enggau kapasiti pengawa nguna injin ti tinggi,” ku Fatimah.
Kelimpah ari tu, ku Fatimah, kenyau ari Januari 2020 nyentuk bulan Disember 2023, bisi 399 peminta Bantu Khas Pesakit Tungkul Sengayuh (BKPBP) udah dikemendarka di nengeri tu.
Ku iya, bantu tu udah ngena agih belanja sepenyampau RM6,944,780.
“Di Sarikei naka ke diatu, bisi 209 iku pesakit udah nerima perubat ba Unit Hemodialisis Sepital Sarikei enggau penyampau injin ti bisi 16 buah dalam taun tu.
“Kitai ngarapka enggau penambah injin tu ulih meri pemaik ngagai pesakit ti berubat di Sepital Sarikei,” ku Fatimah nambah.
Sama bisi dalam pengerami tu iya nya Direktor Sepital Sarikei Dr Mohamad Ng SIah Huat, Penulung Direktor Kanan Pampang Bantu Pengelantang Pendiau Rama Armisy Basri enggau pengari Residen Bagi Menua Sarikei Susie Dominic Junit.