Wong mujur mantu komuniti di menua pesisir Sibu dalam pemansang pengawa berumah
SIBU: Chairman Parti Sa’Ati Rayat Sarawak (SUPP) Pampang dudong Wong Ching Yong udah mujur mantu komuniti di kandang menua tu ngulihka duit jali pengawa berumah nengah Perbadanan Pembangunan Perumahan Sarawak (HDC).
Tu iya nya chara tu beguna dalam ngemanahka kualiti pengidup rayat kelebih agi di kandang menua pesisir.
Bedau lama ti udah, Wong begulai enggau Sekretari Politik Premier Sarawak William Anut sereta Pemancha Paing udah nyuaka surat enggau penyampau RM700,000 ngagai Tuai Rumah Gendang dikena ngaga rumah panjai baru di Sungai Assan Tengah.
Tu iya nya endang besai reti ngagai TR Gendang sereta peranak dipegai iya ti ngaga rumah baru ba palan ke likun ari ti dituntung penusah ampuh bah.
Wong mega udah ngelawa ke Rumah
Anthony pengudah peminta duit jali pengawa berumah sida enda diterima HDC laban enda nitihka penetap minimum bisi 10 pintu bilik.
Pengudah ninga penerang ari Rh Anthony, Wong besemaya deka mantaika peminta baru dikena ngulihka pemendar bulih duit jali pengawa berumah ari HDC.
Kelimpah ari tu, kena hari ke sama mega Wong udah berundang ke Rumah
Mai ngelimpangka awak berandau sereta ninga sebana penanggul ti ditapi peranak di kandang menua tu.
Kenyau ari megai tanggungpengawa Sapit Chairman Opis Kaunsil Kandang Menua Psisir Sibu (SRDC) dalam taun 2020, Wong mujur mantu 20 buah rumah panjai ditu ngulihka pemendar ba peminta duit jali HDC, enggau penyampau urung RM10 juta.
Inisiatif perintah Sarawak
nengah HDC tu enggau tuju ngemansangka pengawa berumah di kandang menua pesisir sereta ngangkatka tikas kualiti pengidup peranak.
Pengeransing Wong tu udah ngayanka komitmen iya dalam nentuka pengelantang pendiau rayat di kandang menua tu seruran tejaga, lalu ngenegapka komuniti di kandang menua pesisir dalam pengawa pemansang nengeri.